Тэд хэн бэ? #3 | Зомбинууд!

Видео тоглоомын ертөнцийг тэдэнгүйгээр төсөөлөхийн аргагүй юм.

"Half Life 3"-ыг тойрсон нууцууд

2007 оноос хойш өнөөдрийг хүртэл интернетэд тавигдсан уг тоглоомтой холбоотой мэдээллүүдийг нэг дор багцлан хүргэж байна.

Monday, July 29, 2013

Assassin's Creed III болон IV-ын талаарх миний бодол.

Ингээд "Параллель ертөнцийн нийтлэл" сэдвийнхээ анхны мэдээг оруулж байгаадаа баяртай байна. Хэрвээ би Ubisoft-ын ажилтан, Montreal дахь салбарынх нь AC төслийн багийн гишүүн байсан бол өөрийн удирдлага болон хамтран ажиллагсадад, мөн уг гайхалтай тоглоомын үндсэн зохиолч болох Оливер Бөүденд хандаж доорх саналыг тавих байлаа. Энэ хүсэл маань энэ ертөнцөд биелэх боломжгүй болсон ч ондоо өөр ертөнцөд биелсэн байгаасай гэж хүссэн учраас энэхүү нийтлэлийг бичиж байгаа юм шүү :)

Assassin's Creed III : Black Blag

Тиймээ, та буруу уншаагүй. Өөрөөр хэлбэл тун удахгүй гарах гэж буй IV анги нь өнгөрсөн 10-р сард худалдаанд гарсан III ангийнхаа оронд гарсан бол илүү дээр байх байлаа. Гэхдээ би ACIII-ыг үгүйсгээгүй гэдгийг санаарай, уг анги нь надад маш их таалагдсан төдийгүй шинэ дүр болох Коннор Кенвай тун онцгой сэтгэгдлийг үлдээж чадсан гэдгийг хэлэх байна. Ингээд тоглоомын тухай би орчин үе болоод өнгөрсөн үе гэсэн хоёр цаг үед хуваагаад тайлбарлаж бичье.

Өнгөрсөн үе : Тоглоомын гол дүр маань Эдвард Кенвай байх болно. Түүнийг та бүхэн Коннорын өвөө мөн өнөөх гайхал Хэйтамын эцэг гэдгийг нь мэднэ шүүдээ. Юуны өмнө ACIII дээрх нэгэн логикгүй гэмээр зүйлийн тухай дурьдмаар байна, уг тоглоомын нэмэлт хавсралт материалууд дээр Эдвардын талаар "дэндүү их" зүйлсийг өгүүлсэн байсан юм. Түүнийг хаана хэзээ хэнтэй гэрлэж, хэдэн хүүхэдтэй болж тэр бүү хэл хэдэн онд хэрхэн нас барсныг нь хүртэл бичсэн байсан гээд боддоо! Гярхай тоглогчид бол ийм мэдээллүүдийг алгасна гэж үү? Тийм учраас энэхүү spoiler-оос болоод удахгүй гарах IV ангийг нь тоглоход жаахан урамгүй л санагдах байх. Гэхдээ зүгээрээ :) Ингээд миний бодлоор бол ACIII маань яг л өмнөх ACII шигээ 3 ангитай байх бөгөөд эхний анги нь Эдвардаар эхэлсэн бол илүү онох байж!

Орчин үе : Дезмонд Майлс. Үйл явдлын хувьд яг л ACIII дээр гардаг шигээ ... гэхдээ нууц агуйд нэвтэрч учир битүүлэг хаалгыг нээх гэж оролдож буй талаар өгүүлэх болно. Мэдээж хэрэг гэнэтийн үйл явдлаар дуусгавар болж олныг алмайруулахгүй бол AC биш шүүдээ хэх.

Assassin's Creed III : Legacy

Өнгөрсөн үе : Энэ удаад Эдвардын хүү болох Хэйтам Кенвай-аар тоглоомын зохиол цааш үргэлжилэх болно. Сонирхолтой биш гэж үү? Хэйтамын хувьд хэнээс ч дутахааргүй намтар түүхтэй нэгэн гэдгийг бид мэднэ. Харин ACIII дээрх нэгэн гомдмоор зүйл нь юу вэ гэвэл ACII-оос 2 Sequence-аар багыг нь эс тооцвол тоглоомын эхний 3 sequence-ийг Хэйтамд зориулсан явдал юм. Мөн Коннорыг өсч томрохыг харуулахад 2 Sequence-ийг зарцуулжээ. Ингээд бодоод үзвэл бидний хүсэн хүлээж байсан нас биед хүрсэн Коннорт маань ердөө 7 sequence харъяалагдаж байгаа юмдаа. Харин тоглоомын DLC-нүүдийн тухайд тоглоом сонирхогчид маань үндсэн зохиолтой холбоотой түүхийг л хүлээж байсан шүүдээ, гэтэл огт өөр зүйлсийн талаар өгүүлсэн нь тун тоогүй хэрэг.

Орчин үе : Энэ удаад Дезмондод маань маш хүчирхэг нэгэн дайсан гарч ирэх болно. Энэ бол Даниел Кросс юм. Түүний тухай дэлгэрэнгүй намтрыг удахгүй бичиж оруулах учраас олон зүйлийн талаар дурьдахгүйэ. Ингээд уг анги дээр Дезмонд, Даниел хоёрын дундах амь өрссөн тэмцлийг өгүүлэх бөгөөд тоглоомын төгсгөлд Даниелийг өөрсдийн талд элсүүлж байгаагаар дуусах болно! Учир нь Даниел Кросс маань өөрөө ассассин шүүдээ, харин Абстергод тархиа угаалгаснаар Sleeper Agent болчихсон юм. Хөөрхий залууг зовлонгоос ангижруулж яагаад болохгүй гэж? Люси Стилман шиг өөрсдийн хүнийг дахиад алдах гэж үү?

Assassin's Creed III : Revolution

Өнгөрсөн үе : Одоо харин Коннор маань орж ирэх болно. Ингэснээр уг цуврал маань Эдвард, Хэйтэм, Коннор буюу өвөө, эцэг, ач хүү гэсэн бүхэл бүтэн гурван үеийн ассассинуудыг Америкын түүхтэй холбоод үзүүлсэн тун сонирхолтой бүтээл болох байлаа! 3 өөр орчинд өссөн 3 өөр онцлог шинж чанар бүхий 3 өөр ассассин! Харин уг ангийн үйл явдлын хувьд ACIII дээр гардаг зүйлс болж өнгөрнө.

Орчин үе : Дезмонд, Даниел хоёр хамтраад Абстергог зорих бөгөөд Варрен Видикийн эсрэг маш ширүүн тулалдааныг тэд хийх болно. Та төсөөлж байна уу? ACIII дээр гардаг шиг энэ бүхэн ердөө аравхан минутанд багтаад өнгөрөх ёсгүй.

==================================================

Даниел Кроссыг үхүүлээгүй харин ч өөрсдийн талд авсан нь бас нэгэн гайхалтай боломжийг нээж өгөх байлаа! Өөрөөр хэлбэл "Assassin's Creed IV"-ийн үйл явдал хувьсгалын үеийн Орос оронд өрнөх бөгөөд орчин үеийн хувьд Даниел маань гол дүр нь болох болно! Ингэснээр Дезмондоос "уйдаж" эхэлсэн тоглогч нарт цоо шинэ уур амьсгалыг мэдрүүлж өгөхөөс гадна түүний түүхийг түр хугацаанд завсарласнаар тоглогчдын дунд тодорхой хэмжээний хүлээлтийг үүсгэх болно шүүдээ. Энэ нь мэдээж хэрэг дараа дараачийн ангиудын рэйтинг болоод борлуултанд нөлөөлөх нь дамжиггүйэ.

Assassin's Creed IV


Өнгөрсөн үе : Орос алуурчин Николай Орелов. Түүний нэрийг та дуулсан л байх. Түүний талаар мөн удахгүй дэлгэрэнгүй дурьдах учраас энэ хүргээд түр мартая. Харин та төсөөлөөд үздээ! Хувьсгалын үеийн хаант Орос орон, өвлийн ордон, галт тэрэг, эцэс төгсгөлгүй мэт үргэлжлэх Сибирийн ой тайга, эзэн хаан Романовын гэр бүл болоод тэдний гунигтай төгсгөл, улаан туг, сүрт жагсаалт, В.И Ленин ба түүний коммунист намын нөхөд, яг л комик номон дээрээ гардаг шиг Никола Тесла болон түүний учир битүүлэг лаборатори мөн Тунгускын дэлбэрэлт хийгээд үхэж өгдөггүй гайхал Распутиныг харах болно гээд боддоо! Яагаад дараа дараачийн ангиуд дээр нь Иосеф Сталиныг темплар болгон харуулж болохгүй гэж? Энэ мэт ургуулан бодоод байвал маш их боломж гарч ирж байна!

Орчин үе : Энэ удаад Даниел Кроссын өнгөрсөн үеийг харуулбал илүү сонирхолтой болох болно. Мөн ингэснээр хуучны Варрен Видик болон Люси Стилман зэрэг танил дүрүүдтэйгээ эргэн уулзаж тэдний талаар илүү дэлгэрэнгүй мэдэх боломжтой болно шүүдээ. Харин ACIV-ийн дараагийн ангиуд худалдаанд гарч Даниелийн түүх цааш үргэлжилсээр тэр Дезмондтой уулзаж, ассассинуудын талд элсэн орж, нууц агуйн учир битүүлэг хаалгыг нээх хүртэл түүний түүх үргэлжлэх болно. Ингээд тэндээс цааш "Assassin's Creed V"-аар Дезмонд маань эргэн ирж болох юм шүүдээ! Эсвэл өөр нэгэн Subject-ын тухай харуулж, яагаад түүнийг "Assassin's Creed : Embers" дээр гардаг Шао Юун бүсгүйтэй холбож болохгүй гэж!

Wednesday, July 24, 2013

#2 | Handyman (Bioshock : Infinite)

Яг л Рапчур хотын Big Daddy нар шиг Handyman нь ган төмөр хуяг дуулга бүхий механикчсан киборг юм. Ялгаа нь гэвэл эх биенийх нь ерөнхий бүтэц болоод үйл хөдлөл нь горилл сармагчинтай тус төстэй бөгөөд Колумбиа хотын билэгдэл болсон эх орончдын дүрэмт хувцсыг өмссөн байдаг аж. Мөн түүний биеийн зарим хэсгүүд нь жинхэнэ хүний эд эсээс бүтсэн байдаг гэвэл та итгэх үү? Түүний толгой нь гэхэд л оюун ухаантай уураг тархи бүхий жинхэнэ хүнийх бөгөөд тусгай шингэн уусмалаар дүүргэсэн шилэн торх доторх зүрх нь биеийнхээ бусад механик хэсгүүдтэй нарийн утсаар холбогдсон байдаг байна. Эдгээр утаснууд нь гар хөлнийх нь залгаасуудаар дамжсан том бүдүүн кабелиуд дотуур явсаар түүний нуруунд байрлах дамжуулагчтай холбогдоно. Харин тэдний гар нь маш том бөгөөд зузаан шаазангаар бүрхэгдсэн байдаг гэнэ.

             "Би альхэдийнээ үхсэн байх ёстой! Намайг дахин битгий тарчилга!" 
                                                                                                                              - Handyman

Бие нь хүндээр өвчилж амьдрах насгүй болсон, аль эсвэл гар хөлөө тайруулж хөдөлмөрлөх чадвараа үүрд алдсан хүмүүст хоёрдахь боломжийг олгох зорилгоор энэхүү төслийг хэрэгжүүлж эхэлсэн хэмээн бүтээгч инженерүүд нь бусдад тайлбарладаг юм. Түүнчлэн хүчирхэг механик биенийхээ тусламжтайгаар хүн шиг амьдраад зогсохгүй Колумбиа хотын бүтээн байгуулалтанд хувь нэмэр оруулах болно хэмээн туршилтанд орогсдод тэд итгүүлнэ. Гэхдээ л эдгээр киборгуудыг өнө мөнхөд амьдарна гээд хэлчихэд хилсдэхгүй шүү. Хэдий зөвхөн бурханд л баймаар ийм гайхалтай бэлгийг тэд уран гарт инженерүүдээс авч чадсан ч гэлээ давхар тэд эцэс төгсгөлгүй үргэлжилэх үүрдийн зовлон шаналалыг мөн тээх хэрэгтэй болсон юм. Учир нь тэднийг унтаж амарч, хооллож чаддаггүй болоод алхах гишгэх нь хүртэл нүүрсний цогон дээр явж байгаатай адилхан байдаг зэрэг зовлон шаналалыг нь тэдний аймшигт хараал зүхлээс олж сонсох боломжтой. Тэднийг та өрөвдөж болох ч өвдөж цөхөрсөндөө улангассан тэдний уур хилэн таныг хормын зуурт тасар татахыг тэдэнд тушааж байдаг нь харамсалтай. Чухам үнэн хэрэгтээ тэдний ард ямар гээчийн нууц нуугдаж байгааг хэн ч үл мэднэ. Магадгүй хөөрхий тэд аймшигт туршилтын золгүй гэрч, амьд золиос болсон ч юм билүү, хэн мэдлээ. Мэдээжийн хэрэг тэднийг зохион бүтээсэн шигээ хүч чадлыг нь тогтоон барьж тэднийг удирдан жолоодох аргыг ч эрдэмтэд зохиосон гэдэг нь илт билээ.
 =========================================================
Ингээд тоглоом дээрх, Handyman-уудын хэлдэг зарим нэг үгсээс сонирхуулъя :

"Миний зүрх ... өвдөж байна."
"Өөрийнхөө хуучин биеийг санаж байна. Маш дулаан ... их дулаахан байсансан."
"Толгой дотор минь араа боолтнууд эргэж байна, их өвтгөж байна!"
"Миний зүрх яг л мөс мэдрэгдэж байна ... бас их хүнд ..."
"Өвдөлт! Өвдөлт!"
"Араа боолтнууд арьсыг маань өрөмдөж байна."
"Комсток миний биеийг авсан! Би ханиад ч хүрээгүй байсан юм!"
"Миний биеийг эргүүлж өг Комсток! Буцаагаад өгөөч дээ!"

Удахгүй гарах шинэ DLC-нүүдээс тэдний тухай нууц түүхийг олж мэднэ гэдэгтээ итгэлтэй байна.
=========================================================

Тэднийг хол зайнд байна хэмээн санаа амарч болохгүй, их хурдтай бас хүчирхэг тул маш богино хугацаанд тэд асар хол газарт хүрэх чадвартай. Мөн Big Daddy нарыг бодвол тун уян хатан хөдөлгөөнтэй агаад өөрийн гэсэн оюун ухаантай роботууд юм. Энэ нь тэднийг улам илүү аюултай болгох бөгөөд сэжигтэн этгээдрүү довтлох тэдний арга барилыг урьдчилан таамаглахын аргагүй билээ. Биенээсээ цахилгаан эрчим хүч ялгаруулдаг тул хүний санаанд оромгүй үйлдлүүдийг мөн хийж чадна гээч! Тухайлбал тэд агаарын төмөр замаар явж өлхөн дөнгөнө. Нүсэр том гараараа бараг л бүтэн биеэ тэд халхалж амжих тул тэдний толгойруу онилно гэдэг боломжгүй хэрэг юм шүү. Харин та санаж яв, хамгийн эмзэг хэсэг нь тэдний зүрх гэдгийг!


Тэдэнтэй тулалдах [с]тратеги (Hard болон 1999 горимууд тоглож буй тоглогчдод зориулав)

  • Эхлээд та хүрээлэн буй орчны өөрт тань саад учруулж болох бусад дайснуудыг устгах хэрэгтэй.
  • Финктоны аж үйлдвэрийн дүүрэг дэх агаарын төмөр зам дээр түүнтэй тулалдаж байх үедээ боломжтой бол та аль болох чиглэлээ сольж явахыг хичээгээрэй. Энэ үед Handyman хэсэг хугацаанд тээнэгэлзэн зогсдог бөгөөд энэ мөчийг нь төмөр замаар гүйх цахилгаан гүйдэлтэй давхцуулах хэрэгтэй шүү.
  • Төмөр замаас зүүгдэж байх үедээ Handyman зүрхээ халхалж чаддагүй тул энэ боломжийг та битгий алдаарай! Харин цахилгаан гүйдэл төмөр замаар гүйж өнгөрмөгц нь эргээд та үсрээд зүүгдэх хэрэгтэй.
  •  Энэ үйлдлийг 10 гаруй удаа гүйцэтгэхэд л та түүнийг дийлэх болно гээд боддоо!
Тохиромжтой зэвсгүүд.
  • Handyman-ы хамгийн эмзэг газар болох зүрхрүү нь онож буудна гэдэг амаргүй даваа юм шүү. Тиймээс танд тэсэрдэг сумтай зэвсгүүдийг санал болгож байна.
  • Хэрвээ тоглогч та үнэхээр сайн буудаж чаддаг бол Карбин нь тун хүчирхэг зэвсэг бөгөөд ойрхон зайнаас буудах тусмаа сумны хүч нь илүү их байна гэдгийг санаарай.
  • Хэт ойрын аль эсвэл алсын бус дундад зайны хувьд яривал гар буу (hand cannon) нь Карбиныг орлоно л гэж мэд. Мэдээжийн хэрэг дайзнаас тань нилээд их сумыг хороох нь тодорхой. Гэхдээ л түүний дайсанд үзүүлэх хор хөнөөл нь үлэмж их юм шүү. Мөн критикал цохилт өгөх магадлал ч тун өндөр юм.
  • Crank Gun буюу автомат пулемётыг дутуу үнэлэх хэрэггүйэ. Зөвхөн Handyman-ы цээжрүү онилоход л хангалттай, бусдыг нь буу маань өөрөө гүйцэтгэх болно. Харин танд хангалттай хэмжээний сум байх шаардлагатай.
  • Shotgun нь тэслэгчийн дараагаар хоёрдугаарт орох хүчирхэг зэвсэг юм. Ойрхон зайнаас тулгаж байгаад зүрхэнд нь буудаж орхивол дайсанд үзүүлэх хор хохирол нь ямар их гээч!
Тохиромжтой вигорууд.
  • Murder of Crows-ыг танд хамгийн түрүүнд санал болгъё. Зөвхөн Handyman-ыг сатааруулна гэж бодож байвал та эндүүрч байна. Хэрээнүүдийг үргээх гэж оролдохдоо Handyman зүрхээ ил гаргаж орхидог юм.
  • Shock Jockey-ийн хувьд мөн л Murder of Crows-той адилхан түүнийг сатааруулах үйлчилгээтэй. Гэвч цахилгаанд цохиулсныхаа дараахан Handyman эргээд цээжээ халхалж амждаг тул амжиж зүрхрүү нь буудна гэдэг бараг л боломжгүй.
  • Undertow. Энэ вигорын тусламжтайгаар түүний цээжийг ил гаргах боломжтой. Мөн түүнчлэн цахилгааны хамтаар ашиглавал ус л болсон хойно түүгээр тог дамжиж Handyman-д хохирол учруулах нь тодорхой.
  • Devil's Kiss нь ерөнхий биенийх нь хувьд л хохирол үзүүлнэ. Гэхдээ л эгзэгтэй үед тун их хэрэг болдог юмдаа.
  • Сайжруулсан Charge-ийн тусламжтайгаар Handyman-ы ойрын зайн довтолгооноос та өөрийгөө хамгаалж дөнгөнө.
  • Return to Sender. Энэхүү вигорыг та зөв газраа зөв цагтаа ашиглаж чадвал Handyman таныг биш өөрөө өөрийгөө л гэмтээнэ гэж мэднэ.
Тохиромжтой тоноглолууд.

Winter Shield (хантааз) болон Fire Bird (гутал)-ыг хамтад нь өмссөн байхад агаарын төмөр зам дээрх тулалдаанд танд маш их давуу талыг олгох болно. Winter Shield нь таныг түр хугацаанд хамгаалалтандаа авах бол Fire Bird нь 5 секундын туршид 400 damage учруулах чадалтай. Тиймээс та Handyman-ы дэргэд газардсанаар түүнд ихээхэн хохирлыг үзүүлж чадна.

Sunday, July 21, 2013

"FALLOUT 3"-ын алдааг засах нь.

Тоглож байх явцад тань, таныг ямар нэгэн байшинруу явж орох үед тоглоом тань гацаж орхисон уу? Тухайлбал Мегатон хотын шериф Лукас Симмсийн гэр ч юм уу ... тэгвэл та санаа зоволтгүй, уг алдааг засах арга зам байдаг байна!

1. My Documents => My Games => Fallout3 => FALLOUT.ini <= энэ файлыг нээж ороорой.
2. Ctrl+F товчоо дараад bUseThreadedAI гэж бичээрэй. Ингээд та bUseThreadedAI=0 гэсэн мөр байгааг олох болно.
3. Одоо мөрний хамгийн ард байгаа 0-ын оронд 1 гэсэн утгыг оруулах хэрэгтэй.
4. Уг мөрнийхөө доор нь мөн iNumHWThreads=2 гэсэн мөрийг нэмж оруулаарай. Ингээд файлаа хадгалаад л боллоо. Амархан байгаа биз :D

Өөрөөр хэлбэл ийм болох ёстой гэсэн үг шүүдээ :

bUseThreadedAI=1
iNumHWThreads=2

Одоо дахиж дээрх шиг алдаа гарч ирэхгүйэ. Харин зэлүүд газрын аянчин танд л гэж зөвлөхөд DeathClaw-уудаас хол яваарай.

Saturday, July 20, 2013

Параллель ертөнцийн нийтлэл!

Тэгэхээр ... блогтоо би нэгэн шинэ буланг нэмж байна. "Alternate Universe Article" буюу "Параллель ертөнцийн нийтлэл" гэдэг нэртэй, хэхэ. Харин хаанаас нь эхэлж тайлбарладаг юм билээ, байз? Хэрэв та "Bioshock : Infinite"-ыг тоглож дуусгасан бол лав миний тайлбарлах гээд байгаа зүйлийг гадарлах байх.

Бидний өдөр тутмын амьдралд маш олон сонголт гарч ирж байдаг шүүдээ. Өглөө орноосоо сэрэхээсээ эхлээд гадаа харанхуй болж эргээд хөнжилдөө орох хүртлээ бид хэдэн зуун сонголттой учирдаг. Унтаж байхад тань хүртэл танаас шалтгаалахгүй олон арван сонголтууд эргэн тойронд тань өрнөсөөр байх болно. Донни Дарко шиг байшингийн тань дээврийг цөмлөөд онгоцны хөдөлгүүр унаад ирвэл та яах вэ? Хэрэв энэ үед таны нойр хүрэхгүй компьютерийнхээ ард порно үзээд сууж байсан бол гамбир болж үхэх аюулаас аврагдаж бас болох юм шүүдээ. Энэ мэтээр ургуулан бодоод үзвэл цаг минут тутамд, бүр секунд тутамд танаас болоод таниас шалтгаалахгүй олон зуун сонголтуудын дунд та амьдарч байгаагаа анзаарах болно. Харин сонголт гарч ирэх бүрт таны хувь тавилан хоёр хэсэгт хуваагдаж байдаг бөгөөд ... энэ бүхэн үргэлжилсээр, үргэлжилсээр ... тантай зэрэгцээд таны хэдэн арван тербум хувилбарууд өөр өөр ертөнцөд зэрэгцээд амьдарч байж болох юм. Тун удахгүй танин мэдэхүйн блогоо нээгдэхээр Шройндингерийн муур, Квантын физик, Эрвээхэйн үзэгдэл болоод үүнтэй холбоотой бусад олон сонирхолтой мэдээллүүдийг оруулнаа.

Харин биелээгүй мөрөөдлийн талбар болсон видео тоглоомын ертөнцийн хувьд авч үзвэл, ондоо орон зайд "Half Life 3" альхэдийнээ нээлтээ хийчихсэн байгаа гээд та төсөөлөөд үздээ. Arkane студи EA-ын мэдэлд шилжиж очоод "Dishonored"-ын 3 дахь анги нь гарахаас өмнө DLC-нүүд нь одоо зарлагдаж байхыг ч үгүйсгэхгүй, аль эсвэл өөр ертөнцөд Стив Жобс насан эцэслээгүй байх бөгөөд тоглоомын зах зээлд хөл тавьж Apple-ын хүчирхэг шинэ платформыг танилцуулж байж ч болох шүүдээ! Тиймээс таны санаж боддог, хүсч мөрөөдөж явдаг бүх зүйлс хэдий энэ ертөнцөд биелэх боломжгүй байлаа ч гэсэн өөр параллель ертөнцөд биелсэн байгаа, биелэх болно гэдэгт итгээрэй. Зарим видео тоглоомын хувьд өөрчлөхийг, нэмж оруулахыг хүссэн маш их зүйл байдаг ч гэлээ тэр бүр тоглогчдын хүсэлтээр болдоггүй шүүдээ. Гэхдээ л параллель ертөнцөд энэ хүсэл маань биелсэн байгаа гэдэгт итгэхийг хүссэн учраас өөрийнхөө блогт би ийм нэгэн цэсийг нэмж байна. Ингээд дараагийн мэдээгээрээ би параллель ертөнцийн "Assassin's Creed III"-ын тухай ярьж өгнөө. Өөрөөр хэлбэл "Assassin's Creed III"-т болоод "Assassin's Creed IV"-д нэмж оруулах байсан өөрийн шинэ санаа, мөн өөрчлөх байсан зарим нэг зүйлсийнхээ талаар бичих болно.

Friday, July 19, 2013

Амьдрал бол яг л видео тоглоом шиг ...

Яг одоо дөрвөн хананы дунд, дөрвөлжин дэлгэц ширтээд сууж буй та бол эцэг эхийнхээ бүхий л шинж чанар, зүс төрх дотроос Random-аар бүтсэн дүр юм шүүдээ.

Дэлхий бол асар том Open World ертөнц юм. Харин бидний амьдарч буй энэ амьдрал бол MMORPG билээ. Камерын байршлын хувьд, тэгэлгүй яахав First Person гэхдээ Shooter биш хэхэ. Бидэнд алхам тутамд маань сонголт гарч ирж байдаг ч зарим нэг сонголтыг дахин хийх боломжгүй бөгөөд эдгээр сонголтуудаас минь шалтгаалаад тоглоомыг төгсгөх бидний төгсгөл дагаад өөрчлөгдөж байдгийг та мэдэх үү? Амар хялбар аргаар амьдрах гэсэн зарим нэг нь тоглоомын дүрмийг зөрчиж cheat, hack хэрэглэх тохиолдол их байдаг. Гэвч хэрвээ гярхай нэгэнд нь report-луулж үйл хэрэг нь илчлэгдээд, administrator эсвэл operator-уудад баригдаж орхивол тэд BAN-дуулж торны цаана суухад хүрнэ. Харин friendly fire ашиглаж бусдын амь насанд хохирол учруулбал магадгүй бүр Perma BAN авах аюултайг ч үгүйсгэхгүй. Тоглоомын дүрмийг хэн сайн мөрдөж, үнэн шударгаар өрсөлдсөн нь ялалтанд илүү ойртдог юм. Бидний амьдрах энэ асар том servert-т аз болоход Item Drop систем гэж бий. Тэр бол бидний хувьд хувь тохиол, боломж мөн сонголт юм шүүдээ. Заримдаа бид хэтэрхий их AFK хийж аль эсвэл idle байснаасаа болоод ажлаасаа, сургуулиасаа хоцордог, хойрго хандаж бусдын итгэлийг алдаж орхидог. Тэр тохиолдолд таныг kick-лэх эрх операторуудын чинь гарт бүрэн бий. Ингээд ажилгүй болсон тэр хүн эргээд Spectator горимд шилждэг юм. Гэхдээ ... амьдрал хэмээх энэ сервер хэзээ ч дүүрдэггүй бөгөөд өөрөөр хэлбэл тоглогчдын тоо хязгааргүй тул танд тохирох gamemode болоод team хаа нэг газарт таныг хүлээж байгаа гэдэгт итгээрэй.  Мэдээж хэрэг Quest байхгүй бол тоглоом хэрхэн сонирхолтой байх билээ? Quest гэдэг нь бидний хувьд зорилго юм. Харин таны хувьд Main Quest чинь юу вэ? Магадгүй хүнтэй гэрлэх, ажилд орох, байшин эсвэл машин худалдан авах байж болох юм. Харин Mini-Quest-ийн хувьд өнөөдөр лекцендээ очиж суух, орой дэлгүүрээс хүнсний ногоо цуглуулах, хүүхдийнхээ эсвэл дүүгийнхээ эцэг эхийн хуралд очих зэрэг байж болно. Эдгээр Quest-үүдийг та биелүүлсээр нэг л мэдэхэд Achievement хүртэж чадна. Энэ бол шагнал, таны сурч, хөдөлмөрлөж, бусдад тус хүргэж байсны хариуд ирэх урамшуулал юм шүүдээ. Давхар та сайн Karma болон Point XP-нүүдийг цуглуулж чадна гээч! Харин энэ эрчээрээ цааш тоглож чадвал тун удахгүй та Achievement Milestone-уудыг алгассаар нэг л мэдэхэд Lifetime Achievement буюу амьдралынхаа хамгийн том мөрөөдөлд хүрч чадна! Хүсэл мөрөөдөлгүй хүн зорилго тэмүүлэлгүй байдаг юм. Тиймээс та өөрийнхөө wishlist-ийг зохиогоорой. Мөн итгэл найдвар, урам зориг гэж үгүй бол мөрөөдөл хүсэл байгаад хэрэг юу байна? Амжилттай яваа тоглогчдын walkthrough-ээс суралц, өөрөө та бусдад guide болж тэдэнд амьдралын tutorial-ыг заахтун.

Нэгэнт overwrite хийгдсэн autosave-руу бид ухарч чадахгүй учраас screenshot авч дурсамж болгон зургийн альбом буюу profile дотроо хадгалдаг юм. Ердөө л энэ юм шүүдээ, амьдралын хамгийн гол утга учир нь дурсамжтай амьдрахад орших билээ. Нэг л өглөө орноосоо босч ирээд та өөрийгөө толинд харахад 70, 80 гарсан хөгшин эмээ эсвэл өвөө болсон байгаагаа анзаарах болно. Тэр үед та өнгөрүүлсэн амьдралаа эргэн саналгалзаад харамсах болов уу? Эсвэл өөрөөрөө бахархах болов уу? Харин харамсахгүйн тулд та одооноос л эхлэх хэрэгтэй. Яг одоо л та өгзгөн дээрээсээ өндийх цаг нь болсон. Мөн өөрт байгаа боломжийг битгий алдаарай ...

Бидний тоглоомын difficulty нь Survival горим дээр тохируулагдсан байдаг бөгөөд та амиа алдвал дахин төрөх боломжгүй. Харин хөл алдаж буруу замаар явсан бол эргээд quickload хийж хамгийн сүүлийн Checkpoint-оос дахин эхлэх боломж танд хэзээд бий. Мөн боломж үргэлж байдаг. Хоолойгоо хэрчүүлж, толгойгоо тасдуулаагүй л бол та амьд байна гэсэн үг, амьдарч мөн амьсгалж байсан цагт бол хэзээ ч битгий ялагдах улаан товчин дээр дарагтун! Inventory чинь дүүрсэн бол хэрэггүй зүйлсийг нь хаяж, хэрэгтэй нэгнийг нь Upgrade хийгээд үлдээх хэрэгтэй. Friend List дотроо сайныг нь add хийгээд муу нэгнийг нь ignore хий. Newbie нарт үргэлж тусалж бай, харин тэднийг битгий доогло. Хэзээ нэгэн цагт та ч мөн тэдний нэгэн адил шинэ тоглогч байсан шүүдээ. Сайн хүмүүстэй нөхөрлөж, мөн сайн хүнтэй гэрлэж хамгийн  сайн зохион байгуулалттай Co-Operation тоглолтыг хийх нь нэн чухал. Хайртай хүнтэйгээ хамтдаа Craft хийж хөөрхөн хүүхэдтэй болоод өөрийн Home Server-т шинэ тоглогч нэмээрэй. Гэхдээ хайр дурлалд яарах хэрэггүйг танд би зөвлье.

Эцэст нь гэж хэлэхэд элдвийн glitch-үүдээс болгоомжилж яваарай ;) , эс тэгвэл амьдралын тань тоглолт error зааж мэднэ шүү ... Мөн үргэлж Level ахиж, шинэ шинэ Skill болоод Perk-үүдийг эзэмших ёстойгоо та бүү мартаарай. Ингээд та бүхэнд би нэгэн Easter Egg-ыг үлдээе. Энэ бол 5 дахь нууц блогийн маань үндсэн сэдэв билээ.

3DES нууцлах алгоритм. (CBC-Cipher Block Chaining)
Түлхүүр : 01100011 01100001 01110010 01110000 01100101 01100100 01101001 01100101 01101101

782d81e47ff769d07b98aed9fb9b0456
a2f829626c1fa7cac9f740c367595551
017e86d204ed2438901842f3717d7683
70f12f66068dacaf
Энэ шифр текстийг та Decrypt хийгээрэй! ;)

Thursday, July 18, 2013

"Bioshock : Infinite"-ын төгсгөлийг тайлбарлая.

Харин эхлээд тоглоомын төгсгөлийг дүгнэхэд :

Миний хувьд "Bioshock : Infinite" аз жаргалтай мөртлөө гунигтайгаар, гунигтай хэдий ч аз жаргалтайгаар төгслөө. Учир нь тоглоомын туршид өрнөсөн тэр бүх үйл явдлууд, тэр бүх гайхалтай хийгээд аймшигтай дурсамжууд бүгд агаар дээрх Колумбиа хотын хамтаар замхран алга болох нь тэр дээ ...  Гэхдээ л эцэг охин хоёр эцэстээ эргээд уулзалдлаа шүүдээ ... энэ л хамгийн чухал нь юм.

Тэгэхээр юу болоод өнгөрвөө гэж үү?
Ингээд тун товчхон тайлбарлая. Харин та тархиныхаа нитрог жаахан ажиллуулах хэрэгтэй болох нь.  Мөн унших үедээ тоглоомын тухайн хэсгүүдэд чухам ямар ямар үйл явдлууд гарч байсныг санах гээд хичээгээрэй. Тийнхүү харьцуулж уншвал ойлгоход илүү дөхөм болно шүүдээ.

========================================================

"А" Ертөнцийн Букер ДеВитт дайны (Battle of Wounded Knee) дараагаар эцэг ламтнаас адислал хүртэж үйлдсэн гэм нүглээ цайруулах болно. Ингэснээр тэрээр туйлын сүсэг бишрэлтэй нэгэн болж нэг ёсондоо л амьдрал нь орвонгоороо өөрчлөгдөж, энэ бүх хөгжил дэвшил нь эцэстээ түүнийг агаарын хот Колумбиаг үүсгэн байгуулахад хүргэнэ. Тиймээ, тэр Комсток болж хувирна.

"Б" Ертөнцийн Букер Девитт дайны дараагаар эцэг ламтнаас адислал хүртэхээс татгалзсан тул түүний амьдрал өөр салаа замаар явсан байна. Удалгүй тэр эхнэртэй болж, Анна хэмээх бяцхан охинтой болох болно. Анна бол Элизабет гэдгийг та мэдэх байх. Гэвч эхнэр нь төрөхийн хүндрэлээр нас барч, сэтгэл гутралд автсан Букер архи ууж, мөрийтэй тоглоом тоглосоор маш их өрөнд орох болно. Хамгийн аймшигтай нь тэрээр охиноо өрөнд өгөхөөр шийддэг юм.

Одоо "A" ертөнцрүү эргээд очъё. Розалинд Лутец. Багаасаа квантын физикийг судалж эхэлсэн ухаантай энэ хатагтай өөр ертөнцрүү, өөр орон зайруу нэвтрэх арга ухааныг олж, хосгүй нэгэн төхөөрөмжийг зохиодог байна. Мөн Комстоктой хамтраад Колумбиа хотын бүтээн байгуулалтад маш том хувь нэмрийг оруулсан юм. Харин Комстокын хувьд түүнд өв залгамжлагч хэрэгтэй байлаа. Ингээд тэрээр "Б" ертөнцрүү явж өөрийнхөө нөгөө хувилбараас өөрийнхөө хүүхдийг Роберт Лутециэр дамжуулж авдаг. Робертын хувьд тэр бол Розалинд өөрөө юм шүүдээ, гэхдээ мэдээж хэрэг өөр орон зайнаас ирсэн нь тодорхой. Хэрвээ Розалинд Лутец эрэгтэй болж төрсөн бол яах вэ? .... чухам энэ л орон зайруу Розалинд очиж өөрийнхөө эрэгтэй хувилбартай танилцаж, холбоо тогтоожээ. Робертын хувьд мөн л шинжлэх ухааныг шүтсэн эрдэмтэй нэгэн байлаа, тийм ч учраас тэд гайхалтай хамтрагчид болж чадсан байна.

Харин "Б" ертөнцийн Букер охиноо Робертод өгсний дараахан маш буруу зүйл хийснээ ухаарч охиноо авахаар араас нь гардаг. Гэвч Аннаг аварч амжилгүй Комсток буюу "А" ертөнцийн өөртөө алдаж орхидог. Энэ үед Tear буюу өөр орон зайруу нэвтрэх гарц хаагдах үедээ Аннагийн чигчий хурууг тасалж орхидог нь тун тоогүй хэрэг шүү. Гэхдээ л энэ нь Анна буюу Элизабетын маань онцгой чадварын эх үндэс нь болох болно.

"А" ертөнцийн хувьд одоо илүү сонирхолтой үйл явдлууд өрнөж эхэлнэ. Гэнэт гараад ирсэн охиныг хатагтай Комсток (Комстокын эхнэр) сэжиглэж Розалинд Лутец болоод нөхөр хоёрынх нь дундаас гарсан хүүхэд хэмээн хардаж эхэлдэг. Удалгүй тэр бүх нууцыг мэдэж авах болно. Ингээд нууцыг задлахгүйн тулд Комсток эхнэрээ хөнөөж, уг балмад хэргээ Дэйзи Фитзройд тохдог байна.

"Б" ертөнцийн Букер бүр илүү сэтгэл гутралд орж, амьдрал нь сүйрч эхэлнэ. Түүний гаран дээр байдаг A.D гэсэн бичээс нь Anna Dewitt гэж байгаа хэрэг юмшүүдээ. Комсток түүнийг хэзээ нэгэн цагт өөрийнх нь араас ирнэ гэдэгт итгэж байсан тул "False Sheperd"-ээс сэрэмжлүүлэх тухай элдвийн зурагт хуудсыг хотоор нэг хадсан байдгийг та харсан байх. Учир нь тэрээр Лутецийн ихрүүдийг алуулахаар Финкийг хөлсөлдөг, харин Финк тэднийг төхөөрөмжтэй нь хамт галдан шатааж осол болсон мэтээр харагдуулах ёстой байлаа. Гэвч тэд өөр орон зайруу зугтаж амждаг юм.

20 жилийн дараа Роберт, Розалинд хоёр энэ бүх гажуудлыг залруулахын тулд "Б" ертөнцийн Букер дээр хүрч ирдэг. Тэгээд түүнийг завинд суулгаад гэрэлт цамхагруу авч явах болно ... эндээс тоглоом маань эхэлдэг шүүдээ. Харин яагаад Букер юу ч санахгүй байсан бэ гэхээр, өөр орон зайд нэвтэрсэн учраас түүний ой тойнд зохиомол дурсамжийг суулгаж өгөх шаардлага гарж л дээ. Ингээд "Б" ертөнцийн Букер маань "А" ертөнцөд хөл тавих болно.

Тэр явсаар Элизабетыг хөшөөн арлаас аварна, гэвч өөрийг нь Парисруу биш Нью Йоркруу авч явах гэж буйг мэдсэн Элизабет түүнээс зугтаадаг. Энэ хооронд Букер, Вокс Популийн босогч нарт баригдаж, тэдэнд зэвсэг авчирсан цагт агаарын хөлгөөр гэррүүгээ явах болзолтойгоор саналыг нь хүлээн зөвшөөрнө. Удалгүй тэр Элизабетыг олж Финкийн аж үйлдвэрийн дүүрэгрүү хамтдаа явдаг шүүдээ. Харин зэвсгийг олж авахын тулд Чен Лин гэх хятад эрийг олох хэрэгтэй болно. Гэвч тэр нас барсан байсан учраас Элизабет онцгой чадвараа ашиглаад Чен Линий насан эцэслээгүй байх "В" ертөнцрүү тэд хамтдаа явдаг байна.

Харин энэхүү "В" ертөнцийн хувьд "Б2" Букер (Өөрөөр хэлбэл "В" ертөнцөд ирсэн "Б" ертөнцийн Букер гэсэн үг. Гэхдээ энэ нь бидний жинхэнэ Букер биш тул "Б2" гэе л дээ.) маань Элизабетыг аврахаар очих үед тэр альхэдийнээ хөшөөт цамхагаас Комстокын гэррүү явсан байх болно. "А" ертөнцөд Корнелиус Слэйттэй тулалдаж байсан бол энэхүү "В" ертөнцөд "Б2" Букер нь Слэйттэй хамтарсан байна. Корнелиустай хамтарсан энэ Букер зөвхөн "В" ертөнцөд харъяалагдаж буй гэдгийг санаарай! Чен Линий хувьд тэр амьд байж байлаа. Харин түүний багаж хэрэгслүүдийг Колумбиа хотын хууль сахуулагчид битүүмжилсэн байх бөгөөд түүнийг эргээд Финкийн дүүрэгрүү зөөнө гэдэг боломжгүй хэрэг байв.

Ингээд Элизабет тэр хоёр "Г" ертөнцрүү нэвтэрнэ. Энэ тохиолдолд өнөөх багаж хэрэгслүүд битүүмжлэгдээгүй байх бөгөөд аль хэдийнээ Вокс Популийн гарт орж их хувьсгал эхэлсэн байх болно. Букерын хувьд энэ ертөнцөд Вокс Популитай нэгдэж, эрэлхэгээр тулалдсаар тэдний дунд баатар болсон байх юм гэнээ. Харамсалтай нь тэр тулалдаж яваад нас барсан байх болно. (Мөн эсрэгээрээ, хэрэв тэр амьд байсан бол магадгүй хоёр ертөнцийн Букер хоорондоо уулзалдах магадлал тун өндөр байх бөгөөд чухам тэр үед юу болох байсныг чөтгөр бүү мэд!) Чен Лин ч мөн хувьсгалын хөлд нэрвэгдэж эхнэртэйгээ хамт алуулсан байжээ.

Энэ "Г" ертөнцөд Элизабет Комстокын гарт баригддаг. Одоо хамгийн төвөгтэй хэсэг нь эхэлж байна ... Ямар нэгэн шалтгааны улмаас Элизабетыг аврахаар Букер хэзээ ч ирээгүй байна. Олон арван жил өнгөрчээ. Нас дээр гарч, хөгшин болсон Элизабет энэ үед Комстокын өв залгамжлагч болсон байх агаад Колумбын армийг удирдаад Ньй Йорк хотруу дайрах болно. Яг энэ үерүү буюу "Г" ертөнцийн ирээдүйрүү Букерыг тэр дуудаж авчрах болно, нас дээр гарсан Элизабет маань. Өөрөөр хэлбэл "Г" ертөнцөд Элизабет, Букер хоёр ирсэн тэр мөчөөс хойш болж өнгөрсөн олон арван жилийг алгасаад "Г" ертөнцийн ирээдүйн Элизабет "Г" ертөнцийн өнгөрсөн үеийн "Б" Букертэй холбоо тогтооно гэсэн үг шүүдээ. Хэдий бүх зүйл дэндүү оройтсон ч гэлээ Комстокын гарт баригдаж өөр орон зайнд өөрийгөө зовлон шаналал битгий амсаасай гэсэндээ, Букерыг өөрийг нь аварч чадалгүй арга мухардаж битгий өөртөө харамсаж хоцроосой гэсэндээ тэр билээ.


Тэгээд түүнийг өөр "Д" ертөнцрүү илгээх болно. Мэдээж хэрэг өөрийг нь олох зөв замыг зааж өгч, хэрэгтэй мэдээллүүдийг өгсөн байна. Энэ орон зай, цаг хугацаанд, Элизабет Комстокын гарт баригдаад төдий л удаагүй байлаа. Нэг ёсондоо "Д" ертөнц нь "Г" ертөнцөөс салаалсан, түүнтэй параллель ертөнц болж байгаа юм. Букер түүнийг очиж аврах болно. Хамтдаа тэд Колумбиагаас зугтах бөгөөд тэгэлгүй яахав тэд явахаасаа өмнө Комстокыг хөнөөж амжина. Тэгээд энэ бүхэн дууссаны дараагаар Элизабет түүнд бүх нууцыг дэлгэдэг байна. Өөрөө түүний охин Анна болох тухай, Комсток гэдэг нь Букер өөрөө болох тухай гээд л. Учир нь Комстокын гарт баригдсан байх үедээ энэ тухай олж дуулж л дээ.

Та төсөөлөөд үздээ, А,Б,В,Г,Д ертөнцөөс гадна хэдэн мянга, хэдэн сая, магадгүй хязгааргүй олон ертөнцүүд байгаа гээд! Тухайлбал өнөөдөр та зоогийн газарт хоол идэж байгаад бугуйн цагаа орхиод ирснээ гэртээ харьсан хойноо л анзаарч гэж бодъё. Тэгээд цагаа авахаар эргэж очих, эсвэл тэр чигт нь хаях гэсэн таны сонголтоос шалтгаалаад таны бие хоёр орон зайд салаална. Мэдээж хэрэг та өөрийнхөө сонголт хийсэн тэрхүү орон зайд л үргэлжлүүлээд амьдрах болношүүдээ. Таныг яваад цагаа олоод ирсэн байлаа гэж бодъё. Харин нөгөө параллель ертөнцөд цагаа олж авчрахаас татгалзсан таны өөр нэгэн хувилбар зэрэгцээд амьдрах болно. Энэ мэт таныг эхийн хэвлээс төрсөн цагаас эхлээд сонголт гарч ирэх бүрт шинэ шинэ орон зайнууд хоёр дахин, гурав дахин нэмэгдэж, нийт орон зайн тоонууд хязгааргүй рүү тэмүүлэх болно.

Ингээд 20 настай Букер дайны дараагаар адислал хүртэхээс өмнөх хэсэгт Элизабет түүнийг авчирна. Учир нь Комсток хэдэн сая орон зайд амьд байгаа тул, түүнийг бүрмөсөн устгана гэдэг боломжгүй хэрэг байлаа. Бүхэл бүтэн нэг сая Букерын арми байгаад ч түүнийг зогсоож чадахгүй. Тиймээс энэ бүхний эх үндэс, язгуурыг нь олж устгах нь зүйн хэрэг шүүдээ. Ингээд энд манай Букер нас барж байгаа юм. Өө тийм, тэр үхэхээсээ өмнө охиноо эргүүлж Робертод өгдөг шүүдээ, өөр нэг орон зайнаас. Тоглоомын хамгийн эхэнд, гэрэлт цамхагийн хаалган дээр бичээстэй байдаг "Охиныг эргүүлж авчраад, өрөө цайруул" гэдэг нь ийм учиртай. Өөрөөр хэлбэл бүх гажуудлыг засч залруулах хэрэгтэй болсон юм.

Харин тоглоом маань эцэстээ "Б" ертөнцийн Букер дээр ирснээр дуусгавар болдгийг та санаж байгаа байх. Мөн охиноо алдсан тэр өдрөө Букер маань эргээд охинтойгоо уулзах болно. Тиймээс тоглоомын туршид өрнөсөн тэр бүх үйл явдлууд, Колумбиа хөлөг, бидний мэдэх Букер, Элизабет, Комсток мөн дэндүү гайхалтай дууч шувуухай минь - энэ бүхэн бүгд ор мөргүй алга болж байгаа юм даа.

"А" болон "Б" Букеруудын хувьд тэр хоёулаа муу хүмүүс байсан. Харин тоглоомын төгсгөл нь сайнаар өөрчлөгдөж буй "Б" Букерээр дуусч байгаа нь үнэхээр сайн хэрэг шүү.
Тоглоомын төгсгөлийг тун товчхон тайлбарлахад нэг иймэрхүү ....

 ========================================================

Ахх, Колумбиа. Өмнөх цувралууд дээр гарсан Рапчур хот яг л тамыг санагдуулж байсан бол Колумбиа танд диваажингийн орныг сануулах байх. Гэхдээ расист эрх баригчдаар дүүрсэн, худал хуурмагаар дүүрэн Комстокыг бурхан мэт шүтсэн хамгийн хөөрхийлөлтэй хүмүүс энд амьдардаг юм. Рапчур хот эрх чөлөөг эрэлхийлж, шашин номлол, үзэл суртлаас ангид байхыг уриалж байсан бол Колумбиа үзэл суртал, шашин шүтлэгээр дамжуулж эрх чөлөөг эрэлхийлсэн байна. Нойтон, чийгтэй, хүйтэн мөн харанхуй Рапчурын гудамж, байшин барилгуудаас илүүтэй өнгө будаг алагласан, гэрэл гэгээтэй Колумбиагийн талбай цэцэрлэгүүд илүү гайхамшигтай сайхан байлаа.

Уг тоглоомыг өөлөх зүйл үнэндээ алга байна. Өөрөө ч би тоглоомын түүхийг сайн ойлгосонгүй хэх. Магадгүй Кристофер Нолан шиг тархитай хүмүүс л бүрэн ойлгох бизээ. Урьд өмнө би ийм гайхалтай, мөн ухаан балартуулам төгсгөлийг хэзээ ч харж байсангүй. Хамгийн гайхалтай нь юу гээч! Уг тоглоомыг нэг удаа тоглож үзсэн хүн заавал хоёрдахь удаагаа дахиж тоглох болно. Анхны удаад мэдэрсэн тэр бүх мэдрэмжүүд хоёрдахь удаад огт өөрөөр мэдрэгдэх болно. Тоглоомын туршид эгшиглэх аялгуу хөгжим, дуулах дуунууд, ханын самбар, зарлалын хуудсууд, харилцан яриа, дүрүүд, үйл явдлууд гээд л бүгд учир шалтгаантай, уялдаа холбоотой байгаа нь ажиглагдана.

Харин энд Элизабетыг бичихгүй байхын аргагүй юм. Видео тоглоомын түүхэнд магадгүй түүн шиг хэрэгтэй хамтрагч, туслах дүр хэзээ ч байгаагүй мэт санагдана. Энэ мэт бичээд байвал хэдэн арван хуудас болох байх. Зүгээр л гуравхан үгээр дүгнэхэд "Bioshock : Infinite" бол ГАЙХАЛТАЙ хийгээд ГАЙХАМШИГТАЙ байлаа!

Wednesday, July 17, 2013

#1 | Оркуудын тухай.

Сайн уу, юу байцгаанадаа. Тэгэхээр та бүхэндээ зориулаад үлгэр домгийн болоод ... байзаарай, миний бие нь тэр гээгүй тэд гэснийг анзаарсан байхаа гэж бодож байна. Өөрөөр хэлбэл гайхалтай хийгээд аймшигтай, ер бусын басхүү өвөрмөц хэсэг бүлэг бодьгалиудын тухай танилцуулах зорилгоор энэхүү цуврал нийтлэлээ эхлүүлж байнаа. Ингээд эхний удаад Оркуудыг танилцуулахыг зорьлоо. Харин дараа дараагийн дугааруудад элфүүд, одой нар, гоблинчууд, зомби нар, цус сорогч нар ... гэх мэтчилэн танилцуулах болноо :) Мэдээж хэрэг эдгээр амьтадгүйгээр видео тоглоомын ертөнцийг үнэхээр төсөөлөхийн аргагүй шүүдээ. За ингээд Оркууд!

[Ү]үсэл гарал

Уншигч таныг би "Бөгжний Эзэн" зохиолыг уншаагүй гэвэл огтхон ч гайхахгүй, харин Петер Жексоны найруулан тавьсан кино бүтээлийг нь үзээгүй гэвэл, аяа сэрэл мэдрэмжгүй чамайг аянга цахилгаан ниргээсэй билээ гэж хэлэхээс өөр аргагүйд хүрэх юмшүү. Киноны хувьд бол мэдээж хэрэг ном зохиолоос сэдэвлэгдсэн нь тодорхой. Харин тэрхүү зохиолыг та биднийг байтугай, таны бас миний эцэг эхийг, зарим нэгний нь бүр өвөө эмээ нарыг мэндлээгүй байх үед Английн зохиолч Жон Роналд Рэүл Толкиен гуай бичсэн юм шүүдээ. Чухам энд л хамгийн анх Орк гэсэн нэр дурьдагдсан байна. Тэд бол ууртай, догшин, хүн төрхтэй, гэхдээ илүү хүчирхэг бас дайчин боловч царай муутай амьтад юм. Энэ тухай удахгүй дэлгэрэнгүй ярих учраас энэ хүргээд түр мартъя. Харин Толкиен гуайн "Бөгжний Эзэн", "Хоббит" болоод "Силмариллион" зэрэг туужууд дээр Оркуудын тухай ихээхэн өгүүлдэг бөгөөд чухам тэр цагаас эхлээд л Оркуудын нэр алдар дэлхий даяар цуурайтаж эхэлсэн байна. Орчин үеийн Англи хэлний толь бичигт Орк гэдэг маань "Чөтгөрийн төрөл" гэсэн тайлбартайгаар бичигдсэн байдаг бөгөөд Толкиены зохиосон Элф хэлнээ бол Орк нь 'Orq' буюу Чөтгөр, мангас, Огре гэсэн утгатай аж. Харин олон тоон дээр 'Orqui' болно. "Силмариллион" дээр тэдний үүсэл гарлын тухай дурьдах агаад Мелкорын бохир цуснаас тэднийг төрсөн гэдэг юм. Мелкор буюу Моргот, цагтаа тэр валар (Арда гаригийн хамгийн анхны бодьгалиуд бөгөөд нийт 14 валар байдаг байна.) байсан юм, цөвүүн цагт тэр дайсан урвагч болж хамгийн анхны харанхуйн ноён болсон билээ. Ардагийн гайхамшигууд болох Хелкарын Иллиун, Ринголын орой дахь Ормал болоод алт мөнгөн хоёр мод Лаурелин,Телперионыг устгасныхаа дараагаар Дундад Газарт ирж Мордорын ууланд тэр бүгсэн байна.

[Г]адна төрх, шинж чанар

Мөн Толкиен гуай зохиолууд дээрээ Гоблинчуудын талаар бичсэн байдаг. Жижигхэн биетэй, хурдан хөдөлгөөнтэй тэд агуйд амьдрах агаад Манант Уулын хад агуйд бүгдэг байна. Харин тэднээс хувь илүү том биетнүүдийг нь Оркууд гэж нэрлэжээ. Хүнтэй харьцуулбал жижиг биетэй, ухааны тал дээр биднээс нэг их гавьж чадахгүй ч гэлээ хүчирхэг бөгөөд харагдаж байгаа шигээ дайчин амьтад юм. Майга хөлтэй, урт гартай, хар гэзэгтэйгээс гадна тэдний арьс нь үнсэн саарал, хар бас хар ногоон өнгөтэй аж. Хэдий тийм ч гэлээ тэдний гайхалтай хүчирхэг дайчид гэдэг нь удаа дараагийн тулалдаанууд дээр батлагдсаар иржээ. Хүчирхэг дайчин баатар бүр сайхан сэтгэлтэй байдаг гэж бүү бод. Харин ч тэд харгис хэрцгий бөгөөд улаан цусыг урсгаж, мах арьсыг тас татахаар архиран улангассан араатнууд билээ. Хамгийн аймшигтай нь тэд хүний махан хүнстэнгүүд юм. Ердөө л тэднийг үзэшгүй муухай мангасууд басхүү хорт зэвүүн дайснууд болгон дүрсэлсэн байна.

Айзенгардын оркууд бас Мордорын оркууд гэж бий. Тэд хоорондоо адилгүй. Мордорын оркууд илүү хүчирхэг, том бөгөөд тэднийг Урук-Хай гэж нэрлэдэг юм. Ер нь Урук-Хай гэдэг нь "Орк ард" гэсэн үг. Илд хуягаар өвч зэвсэглэсэн тэд хүнтэй адил өндөртэй бөгөөд илүү хүчтэй догшин бас хэрцгий. Харин Айзенгардад, өвгөн шидтэн Саруманы гарт бэсрэг биетэй жирийн оркууд харъялагдаж байлаа. Яг л дээр дурьдсан шиг намхан, үнсэн саарал арьстай хүчирхэг бас догшин. Хэдий тийм ч Саруман өөрийн гэсэн Урук-Хайн хүчирхэг дайчдыг буй болгоод зогсохгүй Луртсээр удирдуулсан салааг Амон Хенрүү явуулж, харин дараагаар нь бүхэл бүтэн Урук-Хайн армийг Хелмийн Гүн-рүү илгээдгийг санаж байгаа биздээ? Мөн тэд Саруман болоод Сауроны дараагаар 3-рт орох Дундад Газрын хамгийн аймшигт дайснууд мөн билээ. Тэдний гарт олон баатар эрс амь үрэгдсэний дотор Гундабад ууланд, Мориан агуйд, Кхазад Думд хүйс тэмтрүүлсэн олон одой нар, мөн Роханы Теоден хааны хүү Теодред, Гондорын баатар Фарамирын дүү Боромир, Торин Царсан Бамбайн өвөө Трор зэрэг олон шилмэл дайчдыг дурьдаж болох юм.

[А]ж амьдрал

Энэ талаар Толкиен гуай нэг их зүйлийг бичээгүй бөгөөд Морготын дараагаар өөрсдийн гэсэн хот улсыг байгуулсан талаар нь товчхон дурьдаад л өнгөрдөг байна. Угийн тэд дайчин бас нүүдэлчин ардууд юм. Мөн тэдний агаарт далайх илд болоод нумын хөвчнөөс тасран хийсэх суманд нь үхлийн аюултай хор шингэсэн байдаг гэвэл та итгэх болов уу, таны л мэдэх хэрэг. Мөн тэднийг хүний махаар хооллодог тухай дээр бичсэн шүүдээ. Тэрбүү хэл тэднийг маш ихээр өлссөн үедээ өөрийн оркуудын махыг идэхээс ч сийхгүй өлсгөлөн амьтад хэмээн дүрсэлсэн байна. Тийм учраас ууртай, хэрцгий тэд дургүй нь хүрвэл нэгнээ хүйс тэмтэрч орхих нь бараг л хэвийн үзэгдэл ажээ. Өөрсдийн хачин эвгүй аялгаар тэд хоорондоо ойлголцдог бөгөөд дуулна гэдэг нь үнэндээ хахир төмөр хавиралдаж буй гэлтэй сонсогддог байна.

==============================================================

WarCraft
Харин WarCraft дээр бол огт өөр шүү. Тэднийг илүү баатарлаг бас хүчирхэг хийгээд гайхалтай өвөрмөц соёл иргэншлийг цогцлоож чадсанаар дүрсэлжээ. Азеротын ахин давтагдашгүй гайхамшигт үндэстний нэг болсон тэд хэдий Драэнорт мэндэлсэн ч Харанхуйн Гарцаар дамжин ирж хүмүүн төрөлхтний үр садтай тулалдаан хийдэг байлаа. Гэвч хаанаас ирсэн нь үл мэдэгдэх аймшигт дайсан тэдний хувьд нэг байх агаад хүмүүний эсрэг тэмцэл, тулааныг түр умартаж харин ч хамтдаа Чөтгөрийн Арми (Undead)-ийг устгахаар тэд шийджээ. Тэднийг Дуротаны хүү Тралл удирдаж байлаа. Залуухан бас хүчирхэг мөн биендээ баймгүй ухаалаг Орк дайчин эр. Дараа нь тэд өөрсдийн зүүн хаант улсыг Калимдорруу нүүлгэн иржээ.

Тэдний биеийг дүрсэлвэл 250-300 паунд жинтэй 6-7 фит өндөртэй тул хүнээс том биетэй гэдэг нь ойлгомжтой биз. Харин тэдний эмэгтэйчүүд нь эрэгчингүүдээсээ арай нуруу намтай бөгөөд 50-100 паундаар хөнгөхөн байдаг нь тэдний араг ясны бүтэцтэй холбоотой юм. Мөн л Толкиены зохиол дээр гардаг шиг тэднийг төрөлхийн дайчин ардууд хэмээн өргөмжилжээ, ялгаа нь гэвэл тэд хүний махан хүнстэнгүүд биш юм. Бүр өөрсдийн гэсэн соёл иргэншилтэй бөгөөд нүүдлийн амьдралаар амьдарч, бөөгийн онгод сахиусыг тэд шүтдэг. Дөнгөж төрсөн хүүхдээ тэд суурингийн задгай хэсэгт цугласан оркуудын дунд өргөмжилж өөрсдийн ариун ёс заншлаар адисладаг байна. Эмэгтэй оркуудын хувьд эрчүүдээс дутахгүй чадалтай бөгөөд хүйснээс хамаарсан элдэв харилцаа тэнд огт байхгүйэ. Тийм болохоор яг л эрчүүд шигээ илд дуулга агсаад тулааны талбарруу явж байх нь ердийн үзэгдэл юм. Тэдний хувьд амьдралын нь эрхэм зорилго, юугаар ч сольшгүй үнэт зүйл нь гэвэл нэр алдар билээ. Тулалдааны талбарт Орк үндэстний төлөө амиа өгсөн дайчныг тэд хэнээс ч илүүд хүндэтгэн үзнэ. Товчхондоо бол тэд өөрсдийн омог үндэстэн, өөрсдийн бахархлын төлөө хэзээ л бол хэзээд амиа өгөхөд бэлэн байдаг аж. Мөн тэд өөрсдийн гэсэн хаан удирдагчтай, мөн өвгөд дээдэс үүх түүхээрээ бахархах дуртай улс. Харин хэзээ ч болж өнгөрсөн зүйлд харамсдаггүй нь магадгүй тэдний гайхалтай нэгэн чанар байж мэдэх юм.

Warhammer 40.000
Шинжлэх ухааны зөгнөлт тоглоом тул энэ ертөнцөд эдгээр Оркууд буу зэвсэг агсаж, машин техник унаж байгаад битгий гайхаарай. Шимпанзе шиг богино хөл гартай бөгөөд тэдний толгой нь байж боломгүй том хэмжээтэй. Ухаан муутай мулгуу талдаа боловч тэдний сорууд нь гайхамшигт зэвсэг техник, хуягт хэрэгсэл бүр хөлөг онгоцнуудыг хүртэл урлаж чадна гээч. Цусанд улайрсан тэдгээр дайчдын тулалдана, дайтна гэдэг нь чадварлаг гэж жигтэйхэн. Мөн тэд хэзээ ч аль нэгэн улстай эв найрамдлын гэрээ тогтоон хамтарч байгаагүй гэдэг. Харин Гоблинчуудын хувьд ярьвал WarHammer дээр Грэтчин болоод Снотлингууд болж байгаа юм. Оркууд тэдэнтэй холбоо тогтоосон боловч төд удалгүй хөөрхий оркоидууд болсон Гоблинчуудыг торгуулийн суман хэлбэрээр ашиглаж, бүр зарц боолоо болгоод зогсохгүй хэрэг болвол хэрэглэж байхаар хүнс хоолоо болгож орхижээ.

Elder Scrolls
Хүн төст төрхтэй бөгөөд залуугаараа үхэхээс ч буцахгүй дайчид Тамриелд аж төрдөг юм гэнэ. Хүнээс гажууд том биегүй ч гэлээ ялгаа нь гэвэл шөрмөслөг бас өндөр. Мэдээж хэрэг зэвхий саарал арьстайгаас гадна доод эрүү нь хөгжиж, хурц соёо шүд ургажээ. Тэд анх элфүүд байсан гэдэг. Мөн тэднийг Орсимеричүүд гэж нэрлэдэг байлаа. Триминакыг даган нүүдэллэж, удалгүй Триминак бурхан Даэдрикын ханхүү буюу Боэтиагийн Малакат болох тэр үед Орсимэричүүдийн алтан шаргал арьс нь гандан зэвхийрч ногоон өнгөтэй болоод зогсохгүй үзэсгэлэнт төрх нь гундаж үзэшгүй муухай араатнууд болон хувилжээ. Гэхдээ л тэдний гайхалтай тулааны чадвар мөн эр зориг, дайчин шинж чанар нь хадгалагдан үлдсэн байна. Мөн тэд Тамриелын хамгийн сайн дархчуулын нэг нь билээ.

Энэ мэт дурьдвал тоймгүй олон тоглоомд Оркууд маань голлох биш ч тун онцгой үүргийг гүйцэтгэдэг юм шүү ....

Дараагийн дугаарт Зомби нар, харин тэрний дараад Нацистуудыг танилцуулах болноо :)

Sunday, July 14, 2013

"Team Fortress 2" дээр авч болох үнэгүй малгай болон итемүүд!

Гадаадын серверүүдэд тоглож байхдаа та гоё гоё малгайтай, гоё хувцастай тоглогчидтой олон таарсан байх тийм үү? Харин тэдний өмсч байгаа шиг малгай хувцаснуудыг худалдаж авъя гэвэл бас тийм ч хямдхан эд биш. Мөн таныг зүв зүгээр байж байхад чинь хэн ч эдгээр итемүүдээсээ үнэгүй өгөхгүй шүүдээ. Харин зэвсгийн хувьд бол Item Drop системийн ачаар долоо хоног бүрт дунджаар 7-10 итемийг хожих боломжтой гэдгийг битгий мартаарай. За ингээд TF2-ын шинэхэн тоглогч нартаа зориулаад зарим нэг малгай болоод бусад урамшууллын итемүүдийг хэрхэн үнэгүй хожиж болох талаар зааж өгье.

Тэгэхээр ... малгайтай болохын тулд ердөө л миний доор бичих тоглоомнуудыг тоглоход л хангалттай. Үнэхээр амархан байгаа биздээ :D Хамгийн гол нь эдгээр тоглоомнууд нь FREE буюу үнэгүй! Мөн эдгээр тоглоомнуудыг тоглоход хүндрэлтэй зүйл байхгүй боловч жаахан хугацаа зарцуулах хэрэг гарах байх шүү.


Малгай : Alien Swarm Parasite
Класс : Бүх 9 дүрд тохирно.
Тоглоомын нэр : Alien Swarm (Үнэгүй!)
Achievement-ын нэр : Hat Trick

"Alien Swarm" дээр Hat Trick achievement-ыг авахын тулд ердөө л та сүлжээнд холбогдоод 2 ко-оп даалгаврыг биелүүлэхэд л хангалттай. Ко-оп гэдэг нь бусад тоглогчидтой хамтраад тоглоно гэсэн үг шүүдээ. Эдгээр co-op, moba, rpg, mmorpg, fps, sandbox гэх мэтийн үгс танд танил биш байвал энэ сардаа багтааж оруулах миний өөр нэгэн нийтлэлийг хүлээгээрэй. Тэнд би видео тоглоомнуудын төрөл жанрын тухай маш ойлгомжтойгоор тайлбарлах болноо. За ингээд дараагийн малгай бол ...


Малгай : Bolt Action Blitzer
Класс : Бүгд
Тоглоомын нэр : CrimeCraft GangWars (Үнэгүй!)
Achievement : Key to the City

Тун сонирхолтой тоглоом шүү. Та өөрийнхөө дүрийг хүссэнээрээ зохиогоод бусад тоглогчидтой хамтраад эсрэг бүлгийнхний эсрэг тэмцэх болно. Key to the City achievement-ын болзлыг хангахын тулд та зохиосон дүрээ Level-6 хүргэх хэрэгтэй.


Малгай : Ghastly Gibus
Класс : Бүгд
Тоглоомын нэр : Team Fortress 2
Achievement : Ghastly Gibus Grab

Энэхүү малгайг олж авахын тулд уг малгайг өмссөн тоглогчийг dominate хийх хэрэгтэй. Dominate хийхийн тулд тухайн өрсөлдөгчдөө алуулалгүйгээр түүнийг 3-4 удаа алахад л хангалттай. Dominate гэдгийг мэдэхгүй байвал нусыг нь хацарт нь наах гээд л ойлгочих :). За тэгээд серверт тоглож байхдаа уг малгайг өмссөн хүнийг олж хардаг л юм бол араас нь гүйчихдэг юм шүүдээ. Ghastly Gibus нь мааш элбэг байдаг бөгөөд TF2-ын хамгийн түгээмэл малгайнуудын нэг юм шүү. Хэрвээ таныг татгалзахгүй бол уг малгайг авахад чинь тусалж болох юм ;) Блогийн хоёрдахь багана дээр миний Steam хаяг байгаа.


Малгай : Frontline Field Recorder
Класс : Бүгд
Тоглоомын нэр : Team Fortress 2
Achievement : Local Cinema Star

Уг achievement-ыг авахын тулд таны Youtube дээр upload хийсэн TF2-ын бичлэг 1000 хандалтыг авсан байх шаардлагатай. Харин тоглолтын явцыг бичихийн тулд Replay систем бүхий серверийг олох хэрэг гарнадаа, мөн TF2 маань өөрөө replay editor-той тул та өөрийнхөө бичлэгийг хүссэнээрээ янзалж засварлаж болно. Achievement-ын хувьд тийм ч амар эд биш байгаа биз, гэхдээ хэрэв та бичлэгээ хийсэн бол надруу явуулаарай. Өдөр болгон орж үзэж амжихгүй байж мэдэх ч таныг achievement-аа авах хүртэл тань бичлэгийг тань "үзэж сонирхож" байнаа. Өө мартах шахлаа бичлэг хийх бол "F6" товчийг дардаг юм шүү.


Элэглэл (Taunt) : Director's Vision
Класс : Бүгд
Тоглоом : Team Fortress 2
Achievement : Star of My Own Show

TF2 дээр taunt хэмээх сонирхолтой нэмэлт хөдөлгөөн байдгийг та мэдсэн л байх. Гэхдээ үүнийг "G" товчоо дараад хийдэг энгийн хөдөлгөөнтэй андуурч болохгүй шүү, уг taunt-ыг гүйцэтгэхийн тулд taunt-ыг яг л  дээрх зурган дээрх шиг өөрийн loadout дотроо байрлуулсан байх хэрэгтэй. Харин хэрэглэх үедээ "H" товчоо дараарай. Энэхүү achievement нь дээрх Local City Star achievement-тэй бараг л холбоотой гэж хэлж болно. Өөрөөр хэлбэл та TF2 replay-editor-той жаахан зууралдахад л энэхүү хөгжилтэй taunt-ыг өөрийн болгоод авчихна даа.


Малгай : The Full Head of Steam
Класс : Бүгд
Тоглоом : Team Fortress 2
Achievement : Foundry Milestone

Энэхүү achievement-ийг биелүүлэхийн тулд cp_foundry газартай холбоотой 11 achievement-ын 7-г нь авахад л болно. Хамгийн хялбар арга бол эдгээр урамшууллын араас хөөцөлдөлгүй зүгээр л уг газар дээр хэд хэдэн тойргийг бүтэн тоглоод үзээрэй гэж зөвлье. Achievement-уудыг та аяндаа л олоод авна.


Хэрэгсэл : Professor Speks
Класс : Бүгд
Тоглоом : Team Fortress 2
Achievement : байхгүйэ

F2P тоглогчдыг Premium болоход нь туслах хэрэгтэй. F2P-ээс Premium болох үед өөрийг тань Premium болоход хамгийн их нөлөөлсөн хүнийг найзуудынхаа жагсаалтнаас сонгохыг TF2-ын зүгээс танд санал болгох болно. Ингээд сонгогдсон тэр ачтай хүн уг нүдний шилний эзэн болнодоо. Ер нь тэгээд ч шинэхэн тоглогчдыг тэнэг мангар Noob гэж дуудалгүй тэдэнд сайхан хандаж яагаад болохгүй гэж, айн хэхэ. Учир нь бүгдээрээ л анх F2P тоглогч байсан, бүгд л анх Noob байж үзсэн шүүдээ.


Малгай : The Flamingo Kid
Класс : Мэргэн буудагч
Тоглоом : Super Monday Night Combat (Үнэгүй!)
Achievement : Rookie Agent

Таныг Level-5 хүрэхэд уг achievement-ийн болзол хангагдах болно. Харин "Super Monday Night Combat" гэх уг тоглоомын хувьд TF2-той дүйцэхүйц маш сонирхолтой тоглоом гэдгийг хэлье. Бараг л дэлхийн хамгийн шилдэг Free-2-Play тоглоомнуудын эхний арван байрны нэгэнд нь орох байх шүү.


Малгай : The Triclops
Класс : Пайро
Тоглоом : Super Monday Night Combat (Үнэгүй!)
Achievement : All-Star Agent

Энэ удаад та Level-20 хүртлээ тоглох хэрэгтэй боллоо! Тоглоод л бай, тоглоод л бай нэг л мэдэхэд та уг achievement-ийг биелүүлж малгайгаа авч чадах болно. Мөн дээр хэлсэн шүүдээ уг тоглоомын хувьд тоглоход маш зугаатай гэдгийг!


Малгай : Spiral Sallet
Класс : Бүгд
Тоглоом : Spiral Knights (Үнэгүй!)
Achievement : Mission Accomplished

Хамгийн эхний Clockworks Terminal хүртэл тоглоход л хангалттай. Уг газраар дайраад өнгөрөхдөө та альхэдийнээ энэ тоглоомонд автаад, хамтран тоглогч нартайгаа найзууд болсон байгаагаа анзаарах болно.


Зэвсэг : Black Rose
Класс : Тагнуулч
Тоглоом : Alliance of Valiant Arms (Үнэгүй!)
Achievement : 1st One Down

Үүн шиг амархан achievement-ыг та хаанаас ч эрээд олохгүй байх. Ердөө л дүрээ зохиогоод жаахан тоглоход л гүйцээ. Ингээд уг чамин чичлүүр хутга таных болно!


Хэрэгсэл : Pyrovision Goggles
Класс : Бүгд
Тоглоом : Team Fortress 2
Achievement : A Fresh Pair of Eyes

Яг л дээр дурьдсан Ghastly Gibus малгайтай адилхан замаар уг нүдний шилийг авах болно. Гэхдээ түүнийг нүдэндээ зүүсэн цагт тоглоомын уур амьсгал ямар гайхалтайгаар өөрчлөгддөг гээч! Хэрвээ татгалзахгүй бол танд би тусалж болно шүү ;)


Малгай : Gentle Munitionne of Leisure
Класс : Бүгд
Тоглоом : Team Fortress 2
Achievement : Doomsday Milestone

Өнгөрсөн зун Пайрогийн шинэчлэлээр нэмэгдсэн Doomsday гэх газрын 7 achievement-ийг биелүүлэхэд л болно. Энэ гэхдээ маш хэцүү гэдгийг урьдчилаад анхааруулчихъя. Хэрвээ та авхаалж самбаатай бас хурдтай байж чадвал боломжгүй зүйл гэж байхгүйэ.

HALLOWEEN-ны малгай, хэрэгслүүд

Эдгээр achievement-үүдийг авахын тулд Сүнснүүдийн баярын өдрийг хүртэл хүлээх хэрэг гарнадаа. Жилийн зөвхөн нэг л сард, нэг л долоо хоногт эдгээр газруудад тоглох боломжтой болдог нь хэцүүхэн хэрэг шүү ... уг нь бол ингэж тоглох дүрэмтэй юм л даа ... гэхдээ бодит байдал дээр та дурын trade буюу худалдааны серверт ороход л эдгээр Halloween-ы боссуудын нэгэнтэй нь учрах боломж маш өндөр байх болно. Яахав Halloween-ы шинэчлэлээр гарсан дээрх газруудыг хайж олоод тэнд нь эдгээр боссуудыг устгавал бүр л илүү сонирхолтой санагдах байх. Гэвч яг тэр үеийнх шигээ уур амьсгалтай байгаад, тоглогчид нь урьдын адил өөр хоорондоо нэгдэн нийлж Сүнснүүдийн баярын боссыг устгах хөг ч одоо өнгөрсөн байхаа даа. Гэхдээ та үзээд алдаарай!


Малгай : Horseless Headless Horsemann's Head
Класс : Бүгд
Тоглоом : Team Fortress 2
Achievement : Sleepy Hall0WNED
Хязгаар : Зөвхөн сүнснүүдийн баярын өдрүүдэд, эсвэл бүтэн сар гарсан үед, аль эсвэл Halloween горимыг идэвхжүүлсэн серверүүдэд л энэхүү малгай маань бусад тоглогч нарт үзэгдэх болно.

Морьгүй Толгойгүй хүнийг гарч ирмэгц нь түүнрүү та дайрах ёстой. Гэвч түүнийг маш их хүчирхэг гэдгийг мартаж болохгүй бөгөөд зайгаа барьж явахгүй бол хормын дотор таны толгойг хяргаад хаячихна шүүдээ. Харин түүнийг үхэхээс яг өмнөхөн нь хамгийн сүүлд түүнрүү довтолж чадсан гурван тоглогч уг малгайг хожих болно. Босс маань үхчихсэн, та малгайгүй хоцорсон бол санаа зовох хэрэггүйэ, хэсэг хугацааны дараа ахиад л шинэ тоглолт эхэлж, босс шинээр төрөн гарч ирэх болно. Уг аchievement-ийг биелүүлэхэд хамгийн тохиромжтой дүр бол Scout болон Demo юм шүү, гэхдээ таны л мэдэх хэрэг.


Итем : Unusual Haunted Metal Scrap
Зэвсэг : Unusual Horseless Headless Horsemann's Headtaker
Урлаж болох малгайнууд : Spine-Tingling Skull/Spine-Cooling Skull/Spine-Twisting Skull
Тоглоом : Team Fortress 2
Класс : Бүгд (Малгай) Демо (Зэвсэг)
Achievement : Gored!

Уг achievement-ийг авахын тулд Морьгүй Толгойгүй хүнд үхлийн цохилт буюу хамгийн сүүлийн цохилтыг учруулах хэрэгтэй болно. Гэхдээ буу биш гардан тулааны зэвсгээр гээд боддоо! Жаахан хэцүү хэрэг байгаа биз. Түүнтэй хэр ойрхон байна тэр тоглогчид сүүлийн цохилтыг гүйцэтгэх магадлал илүү өндөр оноогдох болно шүүдээ. Хэрвээ хэрэг явдал амжилттай бүтвэл та Haunted Metal Scrap гэх онцгой металийг авах болно. Ингээд түүнээ ашиглаад малгай болон зэвсэг craft хийн урлах боломжтой юм.


Малгай : Monoculus!
Тэмдэг: Bombinomicon (энгэрийн тэмдэг)
Тоглоом : Team Fortress 2
Achievement : A Fresh Pair of Eyes (малгай) | Dive Into A Good Book (тэмдэг)
Хязгаар :  Зөвхөн сүнснүүдийн баярын өдрүүдэд, эсвэл бүтэн сар гарсан үед, аль эсвэл Halloween горимыг идэвхжүүлсэн серверүүдэд л энэхүү малгай маань бусад тоглогч нарт үзэгдэх болно. Харин Бомбиномиком тэмдэг бол зүгээрээ.

Энэ том нүдийг анх хараад таныг цочоогүй гэж найдая. Малгайг авахын тулд аварга нүдэт нисдэг босс Монокулусыг үхэхээс өмнө түүний дээр газардсан хамгийн сүүлийн гурван тоглогчдын нэг нь болох хэрэгтэй дээ. Харин Монокулусыг үхсэний дараагаар маш том ном гарч ирэх болно, ингээд уг номруу явж орсон тоглогчид гавал аралруу шилжиж очих бөгөөд төмөр тороор торлогдсон Бомбиномикон номыг түрүүлж авах ширүүхэн өрсөлдөөнтэй нүүр тулгарах болно.


Малгай : The Skull Island Topper
Тоглоом : Team Fortress 2
Achievement : A Lovely Vacation Spot

Эхлээд 2012 оны Сүнснүүдийн баярын босс болох Мерасмусыг дийлэх хэрэгтэй! Түүнийг ялсны дараагаар Бомбиномиком ном гарч ирэх бөгөөд түүгээр дамжин гавлын аралруу хүрч очоорой. Яг л өмнөх заавартай адилхан байгаа биз. Үүний зэрэгцээ бусад тоглогч нартай уралдах болно гэдгээ бас бүү мартаарай, уг малгай маань торон дотор бий бөгөөд зөвхөн та түүнд гар хүрэхэд л малгай таных болно. Харин боссыг устгахад мэргэн буудагчийн зэвсэг болох нум сум (Huntsman) хамгийн их хохирлыг учруулдаг юм шүү. Мэдээж хэрэг тултал нь татаад толгойруу нь онилох хэрэгтэй. Мөн энэхүү Мерасмусыг дийлэхийн тулд серверт тоглож байгаа бүх хүмүүс бие биетэйгээ дайсагналцахаа болиод түр хугацаанд эв найрамдлын гэрээ байгуулах гэсэн хэцүүхэн сорилттой тулгарнадаа, хэх. За тэгээд баярын үеэр газрын зургийн энд тэндгүй гэнэтийн гэнэтийн бэлгүүд богино хугацааны давтамжтайгаар олноороо гарч ирдэг бөгөөд азтай хэн нь ч эдгээр бэлэгнүүдийг авах боломжтой.

============================================================

Мөн VALVe-ынхан бусад байгууллагуудтай хамтран ажиллах нь элбэг байдаг тул үе үехэн үнэгүй малгай авах боломж завшаан бас тохиодог юм шүү. Заримдаа та тухайн хамтрагч байгууллагын албан ёсны веб хуудсанд бүртгүүлээд л үнэгүй итем авах боломжтой болно гээч! Иймэрхүү тохиолдлуудад та бүхэнд хэл сураг дуулгаж байх болноо.

Saturday, July 13, 2013

"Assassin's Creed IV" [P]review

Тэнгисийг эзэгнэгч, түрэмгий ширүүн далайн дээрэмчид, залуугаараа үхэхээс буцахгүй дориун догшин эрс. Хөнөөлт эдгээр дээрэмчдийн замд хэн хөндөлдөнө, хөөрхий түүний зүг хөлгийн залуурыг тэд эргүүлнэ. Нэр алдар нь Карибын тэнгисээр цуурайтаж, номхон далайн чинад дахь их гүрнүүдийн чихэнд мөн хүржээ. Хөлөг онгоцныхоо оройд хохимойн дүрстэй хар тугийг тэд мандуулжээ, хэнд ч захирагдахгүй эрх чөлөөг энэ нь бас бэлгэджээ. Зах хязгаар нь үгүй тэнгис далайгаар тэд аялахдаа замгаар хооллож, загасны торон дээр унтах үе зөндөөн байдаг ч, ганцхан зангуугаа буулгасан цагтаа бялтан бууныхаа замгийг суран тэлээнийхээ хамтаар сулладаг юм гэнэ. Дулаан хөнжил, халуун хоол, халуухан хүүхэн, хүйтэн дарс - энэ бүхэн тэднийг угтаж, далайн эргийн торгон элсэн дээрх ил галын дэргэд цуглаад, авдар дүүрэн эрдэнэсээ хувааж суух нь тэдний амьдралын зол жаргал билээ. Зөвхөн өнөөдрөөрөө амьдарч, маргаашийн энэ цагт эсэн мэнд үлдэхийн төлөө шилтэй дарсыг хөнтөрч орхиод юу ч болоогүй гэлтэй наргиж цэнгэхүй агаарт замхрах түүдгийн утааны хамтаар тэдний дуу шуугиан тэртээх алсад цууриатан одно. Исгэрэн хийсэх их салхины нэгээхэн аялгуу дал моддын навчсыг хөдөлгөгч өмнөдийн үлээх салхин, тансар хилэн тэнгэрт мандах шөнийн дэнлүү мөнгөлөг саран хийгээд эгээ л ёроол нь үгүй нүх лугаа адил харлан харагдах өршөөлгүй тэнгисийн их усан л тэднийг амьдарч байсан гэдгийг гэрчилж үлдээ биздээ ...

Уг цувралын талаарх мэдээлэл бага хүмүүст зориулаад удахгүй Assassin's Creed-ийн ертөнцийг маш дэлгэрэнгүйгээр танилцуулсан нийтлэлийг бичиж оруулах бодолтой байна. Алтаир ибн ла Ахад-аас эхлээд Коннор Кенвай хүртэлх бүх ассассинуудын тухай намтар түүхийг мөн тус тусад нь дэлгэрэнгүйгээр оруулна гээд боддоо! Харин одоо ACIV-ын урьдчилсан дүгнэлт буюу preview-ыг сонирхоно уу ...

Тоглоомын хөгжүүлэлт.

Нэгэн сонирхолтой баримтыг энд дурьдая. "Half Life 2 : Episode Two" 2007 онд худалдаанд гарснаас хойш "Assassin's Creed I"-ээс эхлээд "Assassin's Creed IV" анги хүртлээ гар утас болоод PSP, PS Vita дээрх хувилбаруудыг эс тооцвол нийт зургаан үндсэн анги нь хийгдсэн байна! Өөрөөр хэлбэл жилд нэг шинэ анги худалдаанд гардаг гэсэн үг юм. Зарим нэг тоглоомын үргэлжлэл шинэ ангийг тоглогчид хоёр нүдээ ширгэтэл хүлээж байхад өөр нэгнийг нь арай хурдан гараад байна, ядаж хоёр, гурван жилдээ нэг анги гаргаач хэмээн гомдоллох болсон цаг. "Assassin's Creed" цувралын хувьд хоёрдахь ангилалд нь багтчихаад байгаатай та санал нэгдэж байгаа биздээ? Эндээс тоглоомын чанарын тухай асуудал гарч ирж байна. Хэрэв үүнд таны санаа зовниж байгаа бол бүү санаа зов, учир нь энэ оны сүүлээр гарах гэж буй "Assassin's Creed IV"-ын хөгжүүлэлт 2011 онд эхэлсэн юм шүүдээ. Ингээд бодохоор ... магадгүй яг одоо намайг бичиж, таныг уншиж байх энэ үед "Assassin's Creed V"-ын хөгжүүлэлт альхэдийнээ эхэлчихсэн, харин "Assassin's Creed VI"-ын зохиол нь бичигдээд, concept нь зурагдаад эхэлсэн байхыг ч үгүйсгэхгүй. Харин миний хувьд Electronic Arts шиг битгий л тооны араас хөөцөлдөөсэй гэж Ubisoft-оос хүсэх байна даа. Хэрэв ингээд эхэлбэл цувралын маань үнэ цэнэ буурна шүүдээ. Мөн чухам үнэнийг хэлэхэд ACIV нь III-аасаа нэг их ялгагдахгүй байгаа шүү. Уг нь бол цувралын түүхэнд нэг том бүлэг шинээр эхэлж байна гэдэг нь араасаа шинэ технологи,  шинэ дэвшил, шинэ түүх, шинэ уур амьсгал гээд цоо шинэлэг зүйлсийг дагуулж байх ёстой биш билүү? За энэ тухай энд хүргээд орхиё.

Тоглоомын үндсэн хөгжүүлэгчээр мэдээж хэрэг Ubisoft Montreal ажиллаж байгаа бөгөөд Ubisoft-ын өөр бусад 7 студитэй хамтарч байгаа аж. Эдгээр олон студи нь тоглоомын тодорхой нэг элементүүд дээр хуваагдан ажиллаж байгаагаас гадна "Far Cry 3" [2012]-ыг хийсэн баг бүрэлдэхүүн бараг л тэр чигээрээ ажиллаж байгаа гэнэ дээ.

График дүрслэлийн хувьд өмнөх ангиас ялгагдах гойд зүйл үгүй ч тодорхой хэмжээний сайжруулалтыг хийсэн нь маргаангүй. Дуу оруулагч жүжигчдийн хувьд одоогоор нийтэд ил болоогүй байгаагаас гадна тоглоомын Soundtrack хөгжим дээр "Far Cry 3"-ын аяыг бичсэн Брайн Тайлер ажиллаж байгаа юм байна. Аанха, Жеспер Кидийг сураглаж байна уу? Тэгвэл манай залуу "Heroes & Generals" болоод "State of Decay" тоглоомнууд дээр ажиллаж байгааг дуулгая.

Шинэ дүрүүд.

Тоглоомд маань Эдвард Кенвай хэмээх шинэ алуурчны түүхийг өгүүлэх болно. (Алуурчин гэхээсээ илүү ассассин гэх нь арай цэвэрхэн ч юмуу хэхэ) Эдвардын хувьд одоо бидний сайн танил болсон Коннор Кенвайн өвөө, мөн өнөөх гайхал Хэйтамын эцэг гэдгийг сайтар анхаарна уу. Тиймдээ ч тоглоом маань зохиол үйл явдлын хувьд "Assassin's Creed III"-аас өмнөх үйл явдлуудыг харуулна гэсэн үг шүүдээ. Харин орчин үеийн хувьд хэрхэн өрнөх нь одоогоор тодорхойгүй байгаа бөгөөд тун их сонирхол татаж байна. Мөн энд Ubisoft-ын нэг логикгүй гэмээр зүйлийг дурьдах хэрэгтэй. Гярхай тоглогчид бол ACIII-ын нэмэлт материалууд, хавсралтуудаас Эдвард Кенвайн тухай чамгүй олон баримтуудыг мэдэж авсан гэдэгт итгэлтэй байна. Тэр бүү хэл бүр хэзээ хэдэн онд ямар хүнтэй гэр бүл болж, хүүхэдтэй болоод, хаана хэзээ бас хэрхэн нас барсныг нь хүртэл дурьдсан байсан гээд боддоо! Мэдээж хэрэг энэхүү спойлероос болж тоглоход жаахан урамгүй л санагдах байх. Хэрэв та уншаагүй бол над шиг тавьтаргүй зан гаргахгүй байхыг хүсье :) Мөн Хар Сахалт, Бенжамин Хорниголд, Калико Жек, Анне Бонни болоод Чарлз Вэйн зэрэг бодит түүхэн хүмүүс уг тоглоомд маань гарах гэнэ. Хар Сахалтын хувьд манайхан маш сайн мэдэх байхаа. Үнэнийг хэлэхэд бусад хүмүүсийн нэрсийг анх удаагаа л сонсч байна. Хэрэв танд сонин санагдана гэвэл өөрийнхөө танин мэдэхүйн блогт эдгээр хүмүүсийн намтрыг бичиж оруулнаа.

Одоо зарим нэгний нь хувьд харамсалтай гэмээр харин миний хувьд сайшаалтай нэгэн мэдээг дуулгахад энэ удаагийн анги дээр Дезмонд Майлс маань гарахгүй гэсэн шүү. Яагаад миний хувьд сайн хэрэг болсон гэхээр, Дезмондын түүхийг хэсэгхэн хугацаанд завсарлаж тоглогчдын дунд хүлээлт үүсгэхийн хажуугаар өөр нэгэн шинэ дүрийг танилцуулаасай гэж хүсч байна, орчин үеийн хувьд. Харин бодож байгаа шиг минь тийм дүр гарах нь уу үгүй юу, бүгдээрээ хүлээж л байя. Одоогийн байдлаар нийтэд ил болсон мэдээллийн дагуу тоглогч бид нар Абстергогийн хянагч ажиглагчдын үүргийг гүйцэтгэх бөгөөд Эдвардын дурсамжинд нэвтэрч тандалт хийж байгаагаар үзүүлэх юм гэсэн. Хөндлөнгийн аль нэгэн хүнийг биш Эдвардын удмын хүнээс л түүний дурсамжид нэвтрэх боломжтой шүүдээ. Ингээд бодохоор тэр хүн нь хэн байж таарах вэ? гэсэн дараагийн нэгэн асуулт урган гарч ирж байна. Магадгүй энэ нь Дезмонд маань байвал хуучны Варрен Видик, Люси Стилман тэргүүтэй танил дүрүүдтэйгээ эргэн уулзах завшаан тохиож бас мэдэх юм. Дүрүүдийн хувьд ийм байнадаа.

Өрнөх газар, цаг үе.


Мэдээж хэрэг өмнөх ангиудын уламжлалыг хадгалаад тоглоом маань орчин үе болоод өнгөрсөн гэсэн хоёр цаг үед өрнөх болно. Өнгөрсөн үеийн тухайд бол 18-р зууны эхэн хэсэг буюу "Далайн дээрэмчдийн алтан үе"-д өрнөх бол орчин цагийн хувьд яг хэдэнд онд вэ гэдэг нь тодорхойгүй байна. Гэхдээ 2012 оны 12-р сарын 21-ний учир битүүлэг хийгээд гамшигт үйл явдлаас өмнө гэдэг нь ойлгомжтой биздээ. Мөн орчин үе болоод өнгөрсөн үеийг хооронд нь холбож буй Анимус төхөөрөмжийг мартаж хэрхэвч болохгүй. Энэ тухай тун товчхон танилцуулахыг минь зөвшөөрнө үү.

================================================================
Анимус төхөөрөмж.
Анимус бол Абстерго үйлдвэрээс зохион бүтээсэн төхөөрөмж бөгөөд товчхон үгээр тайлбарлавал виртуал реалистик компьютер юм. Өөрөөр хэлбэл уг машинд холбогдсон хүний генетик санах ойруу нэвтэрч өөрийнх нь өмнөх үе буюу өвөг дээдсийнх нь дурсамжинд нь хандах боломжтой болох юм. Дурсамжууд нь гурван хэмжээст зураглалтайгаар маш тод тодорхой харагддаг тул судалгаа шинжилгээ хийхэд ямар их дөхөм гээч. Мэдээж хэрэг дурсамжуудыг өөрчлөх боломж байхгүй л дээ. Эхэндээ Абстерго үйлдвэр ажилчид (темпларууд)-аа сургах зорилгоор "Аними сургалтын хөтөлбөр" мөн цаашлаад "Анимус төсөл" дээр ажиллаж байсан бол өрсөлдөгч Ассассинуудын гишүүдийг олзолж тэдний дурсамжинд нэвтэрч эртний цагийн нууцсын учрыг олоход хэрэглэх болжээ.
===============================================================

Одоо эргээд тайлбартаа орцгооё. Энэ удаад тоглогч таныг уйдаахааргүй олон сонирхолтой газрууд нэмэгджээ. Тоглоомд Хавана, Нассау, Кингстон гэсэн гурван том хот гарах аж. Мөн түүнээс гадна загасчдын тосгон, ширэнгэн ой модод, цайз бэхлэлт, далайн дундах арлууд, эртний Маяачуудын сүм бунхан, балгасууд, тариалангийн талбай, ангийн урц, харуулын цамхаг, усан онгоцны боомт зогсоолууд гэх мэт тоглогч таны нээн илрүүлж болохуйц 50 гаруй газар бий гэнэ. Хосгүй үнэт эрдэнэсийг өөртөө агуулсан 75 орчим далайн эрэг, хадан цохио, булан тохой, хавцал хад, нууц агуйнууд таныг хүлээж байгаагаас гадна эдгээр газруудаас хөлөг онгоцондоо гишүүнээр элсүүлж болохуйц дориун эрсийг олох боломжтой гэнэ шүү хө. Тоглоомын 60% нь эх газар дээр 40% нь далай тэнгист өрнөнө гэдгийг ч мөн дуулгая.

Мэдээж хэрэг ан хийх бүс газрууд байх нь тодорхой, энэ удаад тэнгис далайд халим загас агнах боломжтой болсон нь үнэхээр догь хэрэг шүү. Энэ тухай олж мэдээд PETA-ынхан яасан гэж санана! хэхэ .... Мөн усан доорх ертөнцийг мартаж хэрхэн болох билээ. Эндээс тоглогч та хуучин живсэн хөлөг онгоцон дотроос алт эрдэнэс болоод бусад ер бусын зүйлсийг цуглуулах болно гээд боддоо. Мөн өмнөх ангиуд дээр гардаг View Point (Өндөрлөг газраас эргэн тойрноо харж, газар нээх), Fast-Travel (Нээгдсэн газруудын хувьд нэгнээс нөгөөрүү богино хугацаанд шилжих), Notoriety (эрэн сурвалжлагдах систем) зэрэг үндсэн механизмууд өмнөх ангиудаас хадгалагдан үлдсэн байна.

Өвөг дээдсийн дурсамжинд байхгүй газруудад хүрвэл Synchronization дамжуулагдахгүй байх аюулд өртөж, тоглоом сүүлийн Checkpoint-с эргээд эхэлдэг байсан шүүдээ, тэгвэл энэ удаад газрын зургийн захаар аюултай хөлөг онгоцнуудыг байрлуулж өгсөн байна. Ингэснээр та хэзээ ч газрын зургаасаа гарч чадахгүй гэсэн үг.

Тоглолт, зэр зэвсэг.

Өмнөх ангиудаас сайжирч, шинэчилэгдсэн зүйлсийн нь талаар бичье л дээ. Энэ удаад тоглоомонд маань бууны гүйцэтгэх үүрэг их болсон байна. Урьд нь бид зөвхөн автоматаар дайснуудруугаа чиглүүлдэг байсан бол энэ удаад бууны онилгоог чөлөөтэй ашиглах боломжтой болжээ. Дуртай зүгрүүгээ чиглүүлээд л гохоо дарахад гүйцээ. Харин тоглогч та гох дарахын зэрэгцээ сумнаас бултах ёстойгоо битгий мартаарай, яг л бусад гуравдугаар биеийн тоглолттой тоглоомнууд шиг. Мөн Эдвард маань биедээ 4 гар буу авч явах бөгөөд эдгээр буунуудаараа угсруулан буудаж комбо хийж дөнгөнө гээч. Илдний тухайд гэвэл хоёр илдийг зэрэг ашигладаг болжээ. Тэгэлгүй яахав, ассассины үндсэн зэвсэг болох далд хутгыг хэрхэн мартаж болох билээ. Хамгийн сонирхолтой нь, та илдээр тулалдаж байх үедээ давхар далд хутга буюу hidden blade-ээ ашиглах боломжтой юм. Усан доорх ертөнцийн хувьд мөн тулалдааны системүүдийг боловсруулсан талаараа хөгжүүлэгчид ярьж байсан шүүдээ. Тухайлбал усан доор махчин загас, халимтай тулалдах ч юмуу. Энэ мэт олон шинэлэг зүйлс нэмэгджээ. Мөн тэдний хэлж буйгаар тоглоомын үндсэн зорилго нь "Exploration" буюу нээлт хийхэд орших гэнэ.

Үндсэн даалгавраас гадна олон тооны нэмэлт quest, даалгаврууд нэмэгдэх нь тодорхой. CGI трэйлэр дээр гардаг архины мухлагийн зодооноос эхлээд л төрөл бүрийн сонирхолтой даалгаврууд таны хүлээж байгаа шүү. Цуглуулбал зохих нэмэлт эд зүйлс, материалууд, алт эрдэнэс тэргүүтэй эдгээр зүйлс нь урьдын адил тоглоомыг бас чимж өгжээ.

Далай тэнгисийн тулалдаан.

Тоглоомын 40% нь тэнгис далайд өрнөх болно. ACIII дээр зөвхөн даалгаврын дагуу л хөлөг онгоцоор явдаг байсан бол энэ удаад сонголт хийх эрх таных болсон байна. Хэрэв та санаж байгаа бол яг л "Sid Meier's Pirates!" [2004] тоглоомын 3-р биеийн хувилбарыг тоглож байгаа мэт санагдах вий. Дайсантай тулалдаад тэдний хөлгийг олзолж авсан тохиолдолд хөлгийн гишүүдийг өөрсдийн талд нэгтгэх, дайсны хөлөг онгоцыг эзлэн авах, эсвэл эвдэлж задлаад өөрийн хөлөг онгоц болох Jackdaw-ыг засварлах гэсэн гурван сонголт гарч ирэх нь. Мөн далай тэнгисийн шуурга, аянга цахилгаан, аадар бороо, хүчит давалгаа, махчин загасны довтолгоон гээд гэнэтийн адал явдлууд олон бий бөгөөд энэ бүгдээс шалтгаалаад хөлгийн гишүүд санамсаргүйгээр үрэгдэх тохиолдол бий гэнэ шүү. Харин дайсантайгаа тулалдах үедээ тэднийг хэрхэн устгах сонголтыг мөн л та өөрөө мэдэж шийдвэрлэх хэрэгтэй болно. Зөвхөн хөлгийн ахмадыг нь алсаас буудаж унагах аль эсвэл тулж очоод дэгээгээр оосорлож аваад хөлгийн тавцан дээр газардах зэрэг маш олон боломжтой болжээ. Онгоцны шураг дээрээс олсны тусламжтайгаар агаарт дүүлэн эсрэг талын хөлөг онгоцон дээр газардах гэсэн гоёмсог акробат хөдөлгөөн нэмэгдсэн байна, үүнийг та бүхэн трэйлэр дээрээс харсан байх. Мөн тостой торх далайд хаяснаар ардаа байгаа дайсны хөлгийг устгах боломжтой болсон нь сайн хэрэг шүү. Хөлөг онгоцоо засварлаж сайжруулахаас гадна багийн гишүүдээ хүртэл хувцаслаж болохнээ. ACIII дээр тоглогчдын хувьд хамгийн их таалагдсан зүйл нь юу байсан бэ гэж асуувал гарцаа байхгүй тэд хөлөг онгоцны тулаан гэх байсандаа. Тэгвэл энэ удаад маш том open-world ертөнцөд хүссэн зүгрүүгээ, хүссэн газарруугаа хөлгийн залуурыг мушгих эрх таны гарт хүрч очлоо.

Зохиол.

Ерөнхийдөө тодорхой болсон байгаашүүдээ. Гэхдээ Эдвард Кенвайн гол дайсан этгээд хэн бэ? Эдвард хэрхэн ассассинуудтай холбогдох бол? Темпларуудыг хэрхэн харуулах вэ? Хэйтам гарах болов уу? Абстергод чухам ямар үйл явдал өрнөх вэ? гэх мэт олон сонирхолтой асуултын хариулт одоохондоо нууц байна.

Онцгой багц.

Таван төрлийн онцгой багц зарлагдсан байна. Уншигч та ч мөн адил эдгээр багцаас худалдан авалт хийх бүрэн боломжтой юм. Мөн PS3 болоод PS4 платформууд дээр 60 минутын нэмэлт тоглолт нэмэгдсэн байх бөгөөд PS Vita-ын хувилбар болох "Assassin's Creed III : Liberation"-ын гол дүр Авелин ди Гуандпуэ гарах гэнэ. Ха, энэ тухай мэдээлэл PS4 vs Xbox One хэрэглэгчдийн дунд бас нэгэн хэрүүлийн алимны тарьсан гэдэгтэй өөрийнх дээрээ мөн таны толгойг тавиад мөрийцөхөд ч бэлэн байна. Ингээд дор хамгийн гоёмсог Black Chest Edition-ы зургийг хавсаргалаа. Бусад онцгой багцуудын хувьд дотроо Эдвардын барималтай, барималгүй болоод модон болон төмөр хайрцагтай гэдгээрээ л ялгарах аж.



Компьютерээс шаардагдах үзүүлэлт.

Хамгийн багадаа :
Үйлдлийн систем:    Windows Vista 32 bit
Процессор:                Core 2 Duo E6700 2.66GHz / Athlon 64 X2 Dual Core 6000+
Санах ой:                   3 GB
Хэмжээ:                     20 GB
Видео санах ой:        512 MB
Видео карт:               GeForce GT 440 GDDR5 / Radeon HD 3870
Sound Card:               DirectX Compatible
Интернет:                  Broadband Internet Connection
Direct X:                    Direct X 10
   
Хамгийн ихдээ :
Үйлдлийн систем:    Win 7 64 bit
Процессор:                Core i5-670 3.46GHz / Phenom II X4 905e
Санах ой:                   6 GB
Хэмжээ:                     20 GB
Видео санах ой:        1 GB
Видео карт:               GeForce GTX 650 / Radeon HD 7750 GDDR5
Дууны карт:              DirectX Compatible
Интернет:                  Broadband Internet Connection
Direct X:                    Direct X 11

Screenshots.
Тоглоомын зурагнуудыг эндээс сонирхоорой. => Gallery

Trailer.
"Assassin's Creed IV" [Premiere Trailer]
 

"Assassin's Creed IV" [E3 Trailer]


"Assassin's Creed IV" [E3 Gameplay]


"Assassin's Creed IV" [Naval Gameplay] 



Сайн уу?

Энэ бодит амьдрал дээр энгийн хүний нүдээр биднийг ажвал бид бүхэн эгэл жирийн сурагчид, оюутнууд, төрийн албан хаагч, компаний ажилтнууд, гагнуурчин, цахилгаанчин инженерүүд, эмч, хуульч бас багш сурган хүмүүжүүлэгчид. Таныг хэн гэдэг, хаана ямар ажил хийдэг мөн хэдэн настай бас эрэгтэй эмэгтэй алин болох нь тийм ч чухал биш. Харин гартаа консолийн удирдлага, компьютерийн хулганыг атгасан тэр цагт бид бүхэн огторгуйг хамгаалагч сансрын армийн ахлагч, Британий тусгай салааны элит цэрэг, Навахо омгийн дайчин индиан, Сталинградын баатрууд, эрэлхэг зоригт хайгуулч археологичид, эртний цагийн сүрлэг хөлөг морьтнууд болон хувирах билээ ......

Яг л зүүд нойрны ертөнц шиг видео тоглоом, виртуаль ертөнц гэдэг биелээгүй мөрөөдлийн талбар юм шүүдээ. Та л өөрийгөө үнэлдэггүй болохоос виртуаль ертөнцөд GaMeR таны байгуулсан үйл хэрэг ямар их гэдгийг та төсөөлдөг үү?

Тэгвэл надад хэл л дээ, найз минь.

Эрхэмсэг гүн Лорензо Де'Медичид хүргэсэн эцгийн нь захидал дайсан темпларуудын гарт орж, урвагч Убертын явуулгаар гэр бүл нь хүйс тэмтрүүлж байх тэр үед, Флоренцоос зугтахад нь залуу хүү Эциод хэн тусалж байв? Зоригт инженер Айсак Кларкыг нүгэлд идэгдсэн Ишимура сансрын уурхайн хөлөг дээр газардаж, харийн организмуудад эзлэгдсэн харанхуй хөлгийн нуруугаар хүйт оргиулам хөндий хүйтэн хонгилуудаар алхалж явахад ганцхан түүнд хэн хань болж байв? Элсэн цагийг нээсний балгаар хувь тавилан нь үхлээр зурагдаж, алдааг залруулахаар аймшигт мангас Дахакаг эртний Вавилонд өөрийн биеэр залрахаас нь урьтаж цаг хугацааны аралруу явсан Персийн хунтайжийн дэргэд хэн байв? Нэгдсэн улс талцан хуваагдаж, алсын Африк тивээс ирсэн үй олон хар арьст боолчуудад эрх чөлөөг бэлэглэхийн төлөө агуу Абрахам Линкольн суудлаасаа өндийж, харин түүний эсрэг Умардынхны улангассан их тэмцэл дунд өмнөдийн фронтын шугамд ах дүү Маккалыг нэг нэгнээ олж, армиас оргоход нь хэн туслав? Алтайр ибн Ла Ахадыг Масиафын шилтгээний орой дээрээс хамгийн анхныхаа итгэл үнэмшлийн үсрэлтийг хийж байх тэр үед хамт байсан хүн нь хэн бэ? Эрдэмтэн Жэймсийн хүүг Vault 101-ээс зугтаж, хэмжээ хязгааргүй зэлүүд нутгийг хөндлөн гулд туулсаар эцэгтэйгээ уулзахад нь хэн зуучилж өгөв? Квантын механикч  доктор Гордон Фрийманыг анхныхаа ажилд орохоор Black Mesa-руу явж байх үед галт тэргэнд хамт сууж ирсэн хүн нь хэн билээ? Зоригт бүсгүй Челлийг дэндүү ухаантай робот Гладосын хэтэрхий аюултай зангануудаас зугтахад нь хэн тус хүргэв? 1944 оны 6 сарын 6-ны D өдрийн давшилтаар Нормандийн эрэгт газардсан үй олон холбоотны хүчний дунд тулалдаж явсан цэргүүдийн нэгнийг та таних уу? Мөн хагас жилийн туршид бүслэгдэж, хар дарсан зүүдний биелсэн талбар болсон Сталинградыг чөлөөлсөн улаан армийн цэргүүдийн дунд хэн байв? Волдемортын хар шидний өмнө хүчин мөхөстсөн Харри Поттерт хэн урам зориг өгч хөл дээр нь босголоо? Үеэл ах Романыг суллахаар хотын захын мартагдсан үйлдвэррүү явж байхдаа Нико Беллик цор ганцаараа байсан гэж үү? Моррелын бүлэглэлийг уг үндсээр нь зүйл дуусгаж, өөрийн гэр бүлээс урвах үедээ ч Томми Анжело ганцаараа байгаагүй юм. Олон жилийн дараа мартагдсан хот Рапчурыг Атлантын далайн гүнээс Жекийг ганцаараа олсон гэж та бодож байна уу? Тэгвэл эцэг Недийн өшөөг авахаар Колтон Вайтыг зандалчин ковбой нарын учрыг олоход хэн тус хүргэв? Хоббитоноос харанхуйн эзний бөгжийг тээж, Минас Тиритээс 3000 тохой газарт, хар хаалганы цаадах Барадурын цамхагийн дэргэдэх Мөхлийн Ууланд хэн Фродо, Сем хоёрыг хүргэж өгөв? Мессигийн Барселонаг Аваргуудын Лигийн цомын эзэд болгоход хэн тэдэнд туслав? Гристолын нийслэл Дунвалд хийгээгүй хэргийнхээ төлөө хилс хэргээр гүтгэгдээд гянданд суусан залуу хатан Эмилийн домогт хамгаалагч Корвог нэр төрөө сэргээхэд нь хэн туслав? Яаматай арлын чөтгөр гүнж Химиког даран устгахад нь эрэлхэг бүсгүй Ларагийн арыг хэн хамгаалж байв? Метронд ганцаардсан Артём хүүтэй хамт хүн төрөлхтөний итгэл найдварын хамгийн эцсийн галыг асаалцсан нэг нь хэн билээ .............?

Энэ бол та, энэ бол би. Энэ бол бид бүгд.

Магадгүй бид хэзээ ч нэг нэгнийхээ царай төрхийг харахгүй, уулзалдахгүй байж болох ч видео тоглоом гэх энэ л зүйлээр бид өөр хоорондоо холбогдож чаддаг. Бид бүгд өөр өөр газарт өссөн, өөр өөр боловсролтой, өөр өөр зиндааны, өөр ертөнцийн хүмүүс. Гэвч энэ л талбар дээр бид нэг түвшинд оршиж чаддаг. Бид бол нэгэн бүхэл, бид бол нэгэн гэр бүл. Бид амьдралгүйдээ биш өөр бусад олон гайхамшигтай амьдралаар амьдрах боломж байдаг болохоор л Gamer хэмээх энэ замналыг сонгооцсон юм шүүдээ.

Ингээд эцэст нь гэж хэлэхэд миний блогт тавтай морилохтун. Биелээгүй мөрөөдлийн талбар болсон виртуал ертөнцөөр хамтдаа аялцгаая! :)